Posts from Irek Bobrzak

Saluton post la somero!

nobody@ipernity.com (Irek Bobrzak) — Sat, 26 Sep 2009 14:53:28 +0000

Irek Bobrzak has added a post:

Simple ripozi mi bezonis post la IJK, UK, neoficiala postkongreso en mia varsovia verdejo, post invado de la gastoj, senfina diboĉado nokta ĝis matenoj, fakte post manko de ia normala en prifajfo de ĉio libertempo. Tial mia aktiveco malaperis kaj ĵus reale nun mi komencas agi en la reto. Arkones en Poznano, Pollando (la artaj konfrontoj en Esperanto), kiu okazis semajnon antaŭe, brile fermis la someran periodon. Sed dum la aranĝo pli labori jam mi deziris, kolekti valoran materialon, interparoli ol diboĉi. Sufiĉas :)

Nun venis tempo rememori ĉion. Ĉi tie do, tagon pli frue ol oficiale ĉe http://www.podkasto.net, la A-parto de la 49a elsendo, kiu rememoras la 65an Internacian Junularan Kongreson en Liberec. La parton B serĉu morgaŭ por aŭskulti, elŝuti, kune kun mi rememoradi aŭ simple ekscii, ĉar ne ĉiuj ja la junularan kongreson partoprenis. Baldaŭ aliaj sonmaterialoj, registraĵoj, ankaŭ la filmetoj - sed trankvile. Ĵus la somero finiĝis kaj laboro similas al diboĉado. Ankaŭ lacigas :)

Ĉion bonan al vi ĉiuj!

Irek

La 48a VV-Elsendo ia. pri la pola vojo al libereco

nobody@ipernity.com (Irek Bobrzak) — Mon, 15 Jun 2009 21:37:32 +0000

Irek Bobrzak has added a post:

Eble ion interesan vi trovos en la programo, kie apud la sonraportoj de la boatado kaj scienca pikniko, skize mi prezentas la polan vojon al libereco lige kun la 20a datreveno de la unuaj liberaj balotoj en Pollando. Similan kontraŭstaron de la popolo, kiun ja mi travivis kaj partoprenis, mi observas nun sur la stratoj de Teherano. Ĉu la persa vojo al ia sendependeco de la dogmoj similos al la polaj spertoj? En la priskribo de la programo vi trovos ligilojn al filmetoj, kiuj rakontas pri antaŭnelonga ja tempo en mia lando. Bonvenon al la 48a elsendo: http://www.podkasto.net

La 43a Boatado en Litovio

nobody@ipernity.com (Irek Bobrzak) — Sun, 07 Jun 2009 09:30:30 +0000

Irek Bobrzak has added a post:

Ĉiuj esperantistaj aranĝoj lasas neforgeseblajn rememorojn. Ne ofte ja kune ni renkontiĝas, babilas en la internacia rondo, amike diboĉas ĝis matenoj. Ju pli da ili mi vizitas des pli mi venas al konkludo, ke tiuj malgrandaj pli proksimas al mia koro ol tiuj grandaj. Eble, ĉar la etoso kreskas inter ĉiuj partoprenantoj kaj ne nur en la parto de ili. Ŝajne...

Ne hazarde tion mi skribas. Ĵus mi revenis el la 43a Boatado, kiun ĉiu-jare en Litovio, plej ofte en la lasta semajnfino de majo, organizas gaja teamo de la vilnusa klubo "Juneco". Ne multnombras la aranĝo. Partoprenas ĝin ĉirkaŭ 30 personoj. Tamen, probable ankaŭ pro tio ke mi amas naturon, post partopreno en la unua du jaroj antaŭe, kiam impresis min etoso de la aranĝo, ŝate al ĝi mi revenas. Jam kelkaj skribis pri ĉi-jara boatado, inter ili Alberto: http://www.ipernity.com/blog/alberto.kalnins/157094. Ripetiĝi ne tro mi ŝatas do legu lian detalan raporton kaj spektu la fotojn.

Mi, kiu anstataŭ foti ĉi-jare kolektis nur sonojn por la 48a VV-Elsendo, ŝatas turni vian atenton al Boatado. Sendepende de la vetero ĉiam ĝi estas plena de humuro kaj bonetosa. Risku ne forgesi, fiksu en la memoro nomon de la aranĝo kaj apetu venontjare por ke kune ni ensidu la boatojn, remu kaj diboĉu sur la lagoj, en golfetoj inter la kano, en la tendado ĉe brulfajrejo vespere, ĝis la nokto nokto fin'. Kore mi rekomendas ju pli, des pli bela kaj interesa estas la regiono, kie la boatado okazas.

Por pli bone kompreni, pri kio temas, aŭskultu sonraporton pri la 41a Boatado:

www.ipernity.com/doc/68004/5058920, la filmeton pri ĉi-boatado vi trovos ĉe:

www.viavento.republika.pl/aktuale/vvfilm.htm#42%20boatado.

En la arkivejo de VV-Elsendoj troveblas ankaŭ sonraporto pri la 42a Boatado:

www.podkasto.net/arkivejo/la-42a-boatado-en-litovio.

La nunan sonraporton atendu ĉe:

www.podkasto.net

Ne nur kun Eo ligiĝas la vivo, bedaŭrinde

nobody@ipernity.com (Irek Bobrzak) — Fri, 22 May 2009 20:26:34 +0000

Irek Bobrzak has added a post:

Laste iom mi malaperis de la reto, ĉar la vivo bedaŭrinde ne nur kun Esperanto ligiĝas. Sed tamen de la amo ne eblas liberiĝi :) Intertempe do sukcese mi gvidis la oficialan E-kurson ĉe la Varsovia Universitato (la fina ekzameno sekvos la 4an de julio), cerbumis pri la Junulara Programo dum UK kaj dum la liberaj vesperoj, kiuj iel ne svarmis ĉi-maje, prilaboradis la sonmaterialojn por la nova VV-Elsendo. Ĝi aperos dimanĉe, entute en la retejo www.podkasto.net, kaj en la programo ia. rememoro de Platano pri la Radio ZAM el Parizo, nekonata epizodo de Katakana pri la vivo muzika kaj sonraporto de Saŝa pri la Aroma Jalto, kiu laste okazis en Krimeo.

Komenciĝas la renkontiĝa tempo, tial venontsemajne, kun teamo de geamikoj, mi venos al Litovio por partopreni la 43an Boatadon de la vilnusa klubo Juneco. Jam mi antaŭĝojas ripozon en la litova naturo kaj amikumadon kun la litovaj, estonaj kaj rusaj geamikoj, eble ankaŭ kun vi? :)

Koraj salutoj al vi ĉiuj!

Renkontiĝo kun Ludoviko

nobody@ipernity.com (Irek Bobrzak) — Wed, 22 Apr 2009 22:06:13 +0000

Irek Bobrzak has added a post:

Kelkaj el inter ni (foto en la galerio), memore pri la morto-datreveno, vizitis la monumento-tombon de la majstro. Ĉiuj ja ni loĝas en Varsovio, pli malpli en la proksimeco. Estis sune, relative varme. Kelkaj arboj vekiĝis post la vintra dormo. Verdiĝis la griza ĉirkaŭaĵo. Rudzia zorge purigis la lokon de la ankoraŭ aŭtunaj arbo-folioj, Gonja metis florojn, flamigis la verdajn kandelojn de ni, de la varsovia esperantistaro, de la nekonata esperantisto... Mi kune kun la aliaj deklamis la flamajn kaj plenajn de idealismo poemojn de Zamenhof. Estis agrable, iom solene, sed ne triste. Ne plori ni venis sed danki al Ludoviko pro Esperanto. "La Espero", "La Vojo", "Al la fratoj", "La preĝo sub la Verda Standardo"... Ĉu vi legis tion iam?

Interesa homo estis li, kuraĝa, kaj tiam, kiam ankoraŭ neniu parolis pri demokratio, pri la homaj rajtoj, pri la seksa egaleco, pri la mondo sen landlimoj... Kun amo en koro li kredis la homaron, kiel infano, naiva. Tamen li elrevis tion. Kompare al lia tempo ni vivas kvazaŭ en paradizo, malgraŭ ke homo plu malamas homon kaj frato batalas kontraŭ frato. Kiom da jaroj ankoraŭ? Dek, cent, mil ĝis kiam la mondo komprenos, ke ĉiuj ni ja sur la sama ŝipo. "Ho mia kor' ne batu..." :)

La nova elsendo jam en la reto!

nobody@ipernity.com (Irek Bobrzak) — Sun, 19 Apr 2009 21:44:54 +0000

Irek Bobrzak has added a post:

La nova, 46a elsendo jam en la reto!

Mi invitas vin aŭskulti aŭ elŝuti ĝin el la nova retejo: www.podkasto.net.

Dankema mi estos pro viaj rimarkoj pri la nova retejo.

La programojn komentu rekte en la VVE-retejo :)

Koraj salutoj al ĉiuj!

Proksimiĝas apero de la nova VV-Elsendoj-paĝo

nobody@ipernity.com (Irek Bobrzak) — Wed, 08 Apr 2009 16:58:44 +0000

Irek Bobrzak has added a post:

Pro la organizaj devoj lige kun AS (Ago-Semajno), IJK, UK kaj JES (pri kiuj jam mi skribis), la ideo lanĉi ekde la nova jaro apartan paĝon por la klubaj elsendoj nature fiaskis. Subite aperis tro multe da taskoj en sama tempo, kio influis ankaŭ la longecon de la programoj. Nun, kiam la organizaj aferoj portempe trankviliĝis, daŭras laboroj fini ŝajne pli oportunan por la aŭskultantoj paĝon de Varsovia Vento Elsendoj. La rezultojn de la laboro vi povas vidi ĉe: www.podkasto.net. Ĝis malfermo, kiu okazos la 19an de aprilo kune kun apero de la 46a elsendo, mi petas ĝin nur viziti, sed ne lasi la komentariojn. Viajn opiniojn, rimarkojn, nun vi rajtas lasi ĉi tie :)

Iom pri la podkastaj radio-programoj de VV-Elsendoj

nobody@ipernity.com (Irek Bobrzak) — Tue, 10 Mar 2009 23:33:43 +0000

Irek Bobrzak has added a post:

Mi ne ŝatas propagandon. Eble, ĉar en la propaganda sistemo pasis mia infaneco kaj juneco. Tial, fakte post mia lasta reveno en la reton, kaj ŝajne pro mia scivolema aktiveco viziti viajn paĝojn, kelkaj el inter vi ĵus nun malkovris la radio-programojn de VV-Elsendoj. Venis demandoj: kio tio, ĉu regule, ĉu eblas la programojn elŝuti, de kie?

Jes, ne speciale mi zorgis pri popularigado de la podkasto ĉi tie. Ne pri ĉio ja mi povas okupiĝi. De la dua flanko mi ŝatas, ke la homoj mem malkovras tion, kio estas por ili interesa. Ekde februaro de 2006 la elsendoj gajnis simpation de iom pli ol du mil da aŭskultantoj - tiom da elŝutoj sekvas dum la unuaj tagoj post apero de la nova programo. Ne multaj reagas, nur kelkaj kunlaboras. Sed ĝojas ĉiu aŭskultanto. Ja ideo de la programoj estis fari ion sencan, interesan, antaŭ ĉio tamen gajan en nia ofte tro serioza, senhumura, kritikema kaj konfliktema movado.

Multaj valoraj materialoj malaperis jam el la reto. Mi planis serĉi eblojn kolekti ĉion en speciala paĝo ekde komenco de ĉi-jaro, sed pro AS, IJK, UK kaj JES simple mi devis portempe lasi la ideon. Mia amiko, neesperantisto, kiu laboras en la privata televido, eksplodis ride kiam ekaŭdis pri du mil da aŭskultantoj. - Lasu! - Li diris. - Por du mil ne valoras perdi vian tempon. Dudek mil signifus pripenseme, sed du mil? Lasu. Neniu serioza okupiĝus pri tio.

Evidentiĝas, ke serioza nek mi nek vi estas. Ja ĉiuj ni laŭ siaj ebloj iel kontribuas la unikan kulturon. Ofte sindediĉe eĉ por malpli ol du mil. Sed dank' al tio Esperanto vivas kaj evoluas. Jes, ne rapide. Sed tamen!

Provu la programojn, se ankoraŭ ilin vi ne malkovris. Kontribuu, se vi ŝatus ion prezenti, informi pri io. En la formo de mp3-dosjero la elsendoj elŝulteblas de www.viavento.org. Klaku la baneron de VVE.

Sufiĉas la klarigo? :)

Bonan aŭskultadon!

<untitled>

nobody@ipernity.com (Irek Bobrzak) — Fri, 06 Mar 2009 22:18:30 +0000

Irek Bobrzak has added a post:

Iom da tempo mi dediĉis vagadi tra la ipernity-paĝaro, legi la blogojn, spekti la filmojn, fotojn, desegnaĵojn. Kaj oni diras, ke la esperantistaro pigras :))) Poemoj, raportoj, multe da ĝojo. La unuan fojon fakte mi vagadis tiel longe. Kaj mi ne bedaŭras. Plaĉa estis la vojaĝo, interesa. Uzante la okazon mi salutas do vin ĉiujn! Kiun ankoraŭ mi ne sukcesis viziti mi vizitos - kvankam ekde morgaŭ komenciĝas aŭskultado kaj prilaboro de la son-materialoj, por ke ne nur vidu vi kaj legu, sed ankaŭ aŭskultu :)

Iom pri mi laste.

nobody@ipernity.com (Irek Bobrzak) — Tue, 03 Mar 2009 21:50:08 +0000

Irek Bobrzak has added a post:

Ŝajne mi estas tro kuraĝa :) Ĉi-jare mi prenis sur min respondecon organizi du grandajn projektojn kaj la trian iom helpi. Ne temas pri la elsendoj de Varsovia Vento tamen, kaj eĉ pri gvidado de la klubo je sama nomo. En la projektojn mi ne enkalkulas ankaŭ la kursojn de Esperanto, kiujn la duan jaron oficiale mi gvidas ĉe la Varsovia Universitato. Tio ĉio estas nur ia plezuro de la griza esperantisto ne enuiĝi dum la libra tempo :P

Tiuj du grandaj projektoj, pri kiuj mi menciis, nomiĝas la Junulara Programo ĉe UK kaj JES, la Junulara E-Semajno, rezulto de interkonsento ligi du konatajn novjarajn aranĝojn, nome IS (Internacia Seminario) kaj AS (Ago-Semajno). Krome, por ŝajne jam ne plu dormi normale, mi konsentis iom helpi al la internacia teamo, kiu organizas la 65an IJK en la ĉeĥa urbo Liberec. Kaj fakte, eble ne kun la dormo, sed kun la libera tempo mi komencis iri malplifacile ol pli frue. Komprenon mi petas do karaj, ke mia aktiveco en la reto laste malpliboniĝis, ke mi ne sendas al vi salutojn, pigre respondas al la mesaĝoj.

Oficiala komuniko, do, por vi, karaj. Ekde la pasintjara novembro, kiam grave mi eniris la antaŭpreparadon de AS, paralele mi startis okupiĝi pri projekto de la Junulara Programo kaj ekde decembro ankaŭ pri JES. Pro tio la elsendoj malplilongiĝis kaj malaperis mi de la reto. Nun, pri kio fiere mi anoncas, la plej "nigraj" laboroj restis malantaŭ mi. La bazaj antaŭpreparoj al JES, inter ili trovo de la ejoj, jam finiĝis. Ankaŭ projekto de la Junulara Programo ĉe UK eniris en la duan, pli trankvilan ol la unua periodon. Ambaŭ grandaj projektoj evoluas bone, vere ĝojas min... Mi revenis do al la elsendoj, mi trovis ankaŭ pli da libera tempo por retumi kaj kontaktiĝi kun vi. Jen la sekreto de mia malapero :)

Novaĵoj? Pri kio? Pri la elsendoj, pri la klubo, pri niaj kursoj, pri la 94a UK, la 65a IJK aŭ pri JES?

Eble pri mi, pri mia ankoraŭ dormanta ĝardeno, pri muziko, kiun mi ŝatas?

He :) Bone, ke ekzistas la pola vodko :)))

Koraj salutoj al vi ĉiuj!

viavento

PS. Laste aperintaj fotoj de Zakopane iom rakontas pri loko de la novjara JES. Tie la aranĝo ja okazos. La novaj, kiujn mi aperigos, iom rakontos pri Bjalistoko, ĉar semajnon post la reveno el la montaro mi vizitis la urbon de la majstro. Ĉi-jare pasos 150 jaroj de lia naskiĝo.

Kiel la tempo rapide pasas :)

En la pola montaro aŭtunas...

nobody@ipernity.com (Irek Bobrzak) — Sun, 16 Nov 2008 11:09:15 +0000

Irek Bobrzak has added a post:

De tempo al tempo ĉiu bezonas ripozi. Ankaŭ mi :) Lige kun la pola festo de sendependeco, la 11a de novembro, tradicia semajnfino plilongiĝis krome je du tagoj. Mi decidis uzi la okazon por forkuri la urbon. Ne nur mi. En la trajnoj mankis lokoj. Ne eblis anticipe aĉeti biletojn. Dum la vendreda vespero la varsoviaj stacidomoj similis al futbalaj stadionoj. Tamen spite al malfaciligoj multaj riskis eniri trajnojn sen biletoj. Inter ili ankaŭ mi kun amikino. Tutan nokton ni pasis do inter amaso da homoj en la vagona koridoro, ĉe necesejo :) Komuna humura etoso, eksplodoj de rido, plendoj kontraŭ la fervora kompanio, diskutoj kun konduktoro, valizoj, dorsosakoj, finfine pli kaj pli lacaj mienoj, dormo sur io ajn, ie ajn, homo ĉe homo. Jes, tio neniel ligas kun ripozo. Sed tamen la trajno portis min al montaro.

Novembro en Pollando estas lasta spiro de aŭtuno. Foliarboj en la lasta kolora danco kun la norda vento perdas foliojn, tempo inter mateno kaj krepusko rapide mallongiĝas - kio daŭros ĝis la 23a de decembro. Kutime, meze de la monato, komenciĝas frostoj nokte, aperas neĝo, kaj ĝenerale la vetero estas plumbo nuba kaj pluva. Ĉi-foje, tamen, post foriro de la trajno matene salutis nin suno.

Sudo de Pollando estis ankoraŭ malantaŭ la novda influo, kvazaŭ alia parto de la mondo. En Varsovio 8 gradoj, tie 16... Sen komentario! Vestitaj peze, kontraŭ pluvo, blovo kaj malvarmo, tuj ni devis paki ĉion tro varman. Sub impreso de la suna vetero kaj varmo en t-ĉemizoj fakte ni eniris la montaron. Ĉio alia sur la fotoj, sen flustroj de la folioj sub ŝuoj, sen muziko de la torentoj, sen sento de la freŝa aero kaj varmeco de la suno :) Eble iam ebligos ion la reto.

Ni ĝuis la montaron 4 tagojn. Sune kaj varme estis ekde komenco ĝis la fino. Perpiede ni iris de Szczawnica laŭ Pieniny-montaro tra Beskid Sądecki - ekde Dunajec ĝis Poprad riveroj. Malfacile priskribi kion ni vidis sur la vojoj ne turismaj, kiujn kutime homoj elektas por ne perdi sin, sed la ordinaraj, tiujn, kiuj uzas la montaranoj. Ĉielarko de koloroj, tute ne konata en la urboj silento...

Fine ni atingis mian plej ŝatatan studentan ŝirmejon, en ĉirkaŭaĵo de la urbeto Piwniczna, pli malpli 1 km super la maro. Ĉiun liberan tempon pasas tie miaj delongaj la montaron-satantaj geamikoj. Multe da ĝojo eksplodis pro denova renkontiĝo, ĝis la nokto nokto fin' :)

Kaj nun... Denove hejme. Kun la koro, kiu restis tie, kun vekigilo, kiu diras matene: ek al la laborejo! Damne!

La ordinara tago neordinara

nobody@ipernity.com (Irek Bobrzak) — Mon, 20 Oct 2008 17:04:40 +0000

Irek Bobrzak has added a post:

Delikate, inspire, direkte en mian nazon, de la kuirejo, tra la ĉambroj pli kaj pli intence venas bongusta, ŝatata odoro de bigos'o *). Por hodiaŭ mi decidis ĝin kuiri. Ankoraŭ ne pretas ĝi. Post du, tri horoj, eble. Kvar? Ĉiam longe tio daŭras. Sed estos. Mi scias tion. JES!

En la verdejo la germanoj - legu ge-gastoj de Hanovro. Ankaŭ hodiaŭ vespere do mi babilos Esperante. Jola skribas pri la sonĝoj, multaj bondeziras, la telefonoj ne permesis al mi kapti la posttagmezan dormeton, hieraŭ, kvazaŭ rekte de Novkaledonio, subite aperis kato en mia ĝardeno. Kun plezuro mi observis, kiam ĝi manĝas la restaĵojn post la AS-kunveno kun PEJ dum semajnfino.

Plenumiĝis mia deziro. Ne unu hodiaŭ, sed ĉi tie. Venis pli da reagoj kaj komentoj...

Pro tio, kaj pro la bondeziroj, al ĉiuj vi kore mi dankas.

Mi venas al la gastoj en la verdejo. Mi diris, ke mi aperos tie je la oka.

Ĉion la plej bonan por vi ĉiuj, karaj!

*) Bigos'o estas unu el la plej popularaj manĝoj en Pollando. Kuirigita acida brasiko kun sekigitaj fungoj kaj diversaj aliaj aldonaĵoj... Mniam mniam! Se neniam vi provis bedaŭru kaj nepre, dum via vizito en Pollando, rememoru la nomon kaj mendu ĝin en restaŭracio. BIGOS!

Bigos'o atingeblos ankaŭ en sia orgina formo dum AS! :)

Slovakie en fino de la pasinta semajno

nobody@ipernity.com (Irek Bobrzak) — Thu, 16 Oct 2008 22:46:10 +0000

Irek Bobrzak has added a post:

La semajnfino el Liptovský Mikuláš bonvenis nin suna kaj varma. Fakte en alta montaro de la slovakaj Tatroj videblis jam sufiĉe impona neĝo, sed en la valo, kie troviĝas urbo, ekde vendredo fariĝis kvazaŭ somere. Eĉ mi plendis, ke mi vestis min tro vintre, sed en fakto neniu povas antaŭvidi subitajn veterŝanĝojn ĉi-periode en la montara regiono. Ju pli tio neantaŭvideblas des pli la montaro altas.

Liptovský Mikuláš troviĝas inter du montaroj. De la unua flanko tuŝas la nubojn rokaj pintoj de la altaj Tatroj, kies patro kun la konata urbo Zakopane troviĝas ankaŭ ĉe la pola flanko, de la dua varbas okulojn Malgrandaj Tartoj, malpli rokaj, pli amikaj por promeni, sed ankaŭ altaj. Ĝuste tie amase venadis turistoj kion ni povis nur observi tra fenestroj de la ejo, kie vendrede, sabate kaj dimanĉe sekvis laboroj pri preparado de AS. Bela ĉirkaŭaĵo. Certe ne por sidi en la ĉambroj dum kiam ekstere la vetero kvazaŭ petas promeni. Mi gajnis. Ĉar la emo fumi permesis al mi pli ofte ol la aliaj esti ekstere kaj kun ia revo en spitito ĝui almenaŭ rigardadon de la pintoj. - Prifajfi ĉion, iri tien, ĝui la naturon, aŭskulti la koncertojn de la torentoj... Kriis miajn pensojn. Ne eblis. Ĉiuj aliaj cerbumis, kombinis, serĉis ideojn. Mi ne povis lasi ilin.

ASejo troviĝas pli malpli 15 min. perpiede de la stacidomo, laŭ ponto trans granda rivereca torento. Kompekso de lernejo kun apuda sep etaĝa junulargastejo aspektis taŭge. Ĉio proksime, unu objekto apud la alia. Same kiel dum IJK en Zakopane. Ekde pordo ĝis la alia ne plena minuto tra la korto.

La klasoĉambroj de la lernejo ankaŭ en ordo. Speciale du iom kaŝe ligitaj ne de la ĉefa koridoro, sed unu de la alia tamen apartaj, en kiuj tuj ni decidis organizi ludejon kaj trinkejon :) Duŝejoj ĉe gimnastika salono kaj pinpongtablo rememoris la sonon de la plasta pilko nokte en Malborko kaj Nowy Sącz. Rememoroj rememoroj... Denove venas tempo prifajfi dormon :)

Manĝejo en konstruaĵo de la junulargastejo, apud la enirejo, komence de la longa koridoro, kiu gvidas al dormoĉambroj. Plejmulto el ili estas dupersonaj. Inter ĉiuj du ĉambroj duŝejo! Bone! Komforte. Pli do ol en Malborko, kie ekzisto nur de kelkaj kaŭzis vicojn de tiuj, kiuj deziris esti bonodoraj ĉiutage :)

Sur la dua etaĝo malgranda kuirejo komence de la koridoro. - Memzorgantejo! - Kriis laŭte feliĉa LukiZ ekvidinte fridujon, mikroondan kuirejon kaj varmigilon. Necesejoj iom malnovaspektaj, sed puraj. En la komplekso krome kinejo, preparita jam, komforta, salonoj por lerni dancadon kaj ekstere, ĉirkaŭ ĉio tio, malgranda parko. Plaĉa loko.

Sabate ni vizitis KLF-ejon - belan, luksan, grandegan. Sekve niaj okuloj mezuris koncertejon, kie okazigos la grandaj koncertoj. Ĉirkaŭ la scenejo kaj centre loko por danci ŝnuro de tabloj kun komfortaj foteloj! Apude bufedo, ankaŭ kun loko por sidi kaj ĝui la novjaran tempon. Mi ne malkaŝas, kiu ĵetis sin al la bufedo rigardi, ĉu eble atendas nin tie biero. Ne elegante diri, ke LukiZ :)

Kune kun Petro, Katka, Maria kaj Mikaelo, la slovakaj SKEJ-aktivuloj, finfine ni perdis fortojn kuri laŭ ĉiuj ejoj. Bona kompanio! Plena da ideoj, fervora kaj gaja. Plezuro kune labori. Ankoraŭ vizito en la centro de turismo kaj venis tempo gustumi la lokan frititan fromaĵon. Vypraĵany Syr! Fiksu tion en la memoro!

La sabatan vesperon alvenis ankaŭ forta teamo de la liptova esperantistaro sub la gvido de Jan. Ankaŭ ili fervore eniris la organizan cerbumadon, la laboroj iris do glate, sence kaj plezure. Finfine, ĉar jam mi ekvidis finon de mia vivo pro malsato, ni venis al proksima, bela kiel tiuj en Zakopane, restoracio. Mi manĝis du pladojn! Vypraĵany Syr, kompreneble! Kun terpomoj kaj salatoj. La slovakoj ridis vidinte tion.

Lacaj, tamen kontentaj pro vere efika kaj sukcesa kunlaboro ĉe la antaŭpreparoj, daŭre ni laboris en trajno ĝis la 2a nokte. Ne estis multaj homoj en la kupeo, eblis do. Dum laborpensoj pri AS per okuloj de la imago ni vidis jam la partoprenantojn en proksima naĝejo freneze falantajn en pronature varman akvon geoterman, kie eĉ dum frosto homoj naĝas senstreĉe. Jooooooj, dirus la hungaroj. Neniam mi provis ion tian vintre. Nu, ĉiam devas esti la unua fojo :)

Poste la okuloj jam ĉesis funkcii. Pardonpeton, karaj aligintoj :) Ankoraŭ ne venis AS por la dormon prifajfi. Kaptitaj de la sono trajna ni ekdormis kaj tiel finiĝis la unua AS kunveno internacia. La dua okazos ĉi-semajnfine, tamen jam en Varsovio, kun teamo de PEJ-anoj el kelkaj polaj urboj. Kun LukiZ ĉion ni filmis, prifotis, registris, dum la renkontiĝo do ni prezentos la materialon, por ke ankaŭ ili ekvidu tion kion vidis ni, kaj komenciĝos dua paŝo de la antaŭpreparado.

Jen kion oni povas fari en la libera tempo de semajnfinoj. Ne diru, ke mi freneziĝis :)))

Fotoj koncerne de la AS-kunveno vi trovos ĉe: www.viavento.republika.pl/aktuale/aktuale.htm#20081011

*) AS "Ago-Semajno", ekde 2002 la internacia novjara aranĝo mezeŭrope, dediĉita al junularo kaj tiuj, kiuj sentas sin bone en la junulara etoso. Retejo: www.as.pej.pl

Surprizo por la aŭskultantoj de VVE :)

nobody@ipernity.com (Irek Bobrzak) — Thu, 09 Oct 2008 17:36:56 +0000

Irek Bobrzak has added a post:

Malgranda surprizo! Iom pli frue, ol estis anoncita, aŭskulteblas la sekva elsendo de Varsovia Vento, ĉar dimanĉe - kiam kutime la programoj aperas en la reto - mi estos en Slovakio por komenci la lokajn antaŭpreparojn ĉe Ago-Semajno, la novjara aranĝo de nia klubo.

Sandrine kaj Patriko... Realiĝis via revo :)

Baldaŭ la programo estos ankaŭ elŝutebla mp3-forme ĉe: www.viavento.org.

Elektu: Varsovia Vento Elsendoj.

La ennhavo de la programo en iom kaosa, sed detala priskribo. Simple jam ne pli mi havas tempon,

ĉar post momento mi eniros la trajnon...

Do, karaj. Bonan aŭskultadon!

La unua reago post via vizito :)

nobody@ipernity.com (Irek Bobrzak) — Tue, 07 Oct 2008 18:02:01 +0000

Irek Bobrzak has added a post:

Mesaĝoj, aliĝoj, grupoj, konataj kaj nekonataj vizaĝoj... En ordo ĉi tie :) Plaĉas al mi la retejo. Frustra estas nur manko de komentoj. Vi venas, rigardas, aŭskultas, spektas kaj foriras senreage. Jam mi ekkomprenis do la aliecon de ĉi-loko. Restas almenaŭ spuroj de via vizito, kio ĝojas. Jes, klare - mi konsentas. En la reto estas tro multe por zorgi kaj pensi pri ĉio. Ankaŭ mi vizitas vin, rigardas, aŭskultas, spektas kaj foriras senreage. Pluso kaj minuso de tiuj ĉi lokoj. Akvo kaj oleo - kune tamen solaj :)))

Kiam inter la klubaj renkontiĝoj, kreado de la filmetoj kaj elsendoj, instruado de Esperanto, vojaĝoj kaj la devoj ĉiutagaj, privataj, mi trovos tempon, mi vizitos viajn paĝojn paŝo post paŝo kaj komentos pri ĉio ebla :) Aŭ mi pripensos iun planon. Mi lotumos la komencan literon kaj...

Dankon, ke vi aliĝas tiom multnombre!

Koraj salutoj el Varsovio!

Iom pri la futuro.

nobody@ipernity.com (Irek Bobrzak) — Sun, 05 Oct 2008 09:57:36 +0000

Irek Bobrzak has added a post:

Ne ĝis fino planita aliĝo al tiu ĉi retejo subite instigis min pli rapide ol mi planis aŭskulti la malnovajn Elsendojn de Varsovia Vento. Dum la tri jara agado, eĉ pli ol nur tri jara - iam tion mi klarigos - kolektiĝis amasego da valoraj son- materialoj, bildoj, raportoj kaj intervjuoj. Tamen kun la podkastoj estas same kiel kun gazetoj. Kvankam mi kreas ilin kaj dum la tempo de ilia aktualeco du aŭ tri-foje mi aŭskultas la enhavon, ĉiam la nova programo anstataŭigas la malnovan.

Pro la teknikaj kialoj, aŭ mi diru rekte pro la kostoj krei elŝut-senliman akrivejon en la reto, ĝis nun nur kelkaj lastaj elsendoj akireblas en la paĝo de Varsovia Vento. La aliaj malaperis kaj simple atendas pli bonan futuron. Ĝi alproksimiĝas. Pli kaj pli. De duonjaro jam daŭras preparoj ĉe la nova retejo de VVE. Laŭplane ĝi aperos en la reto la 1an de la decembro - la unuaj ekster la klubo tion vi ekscias :). En nia rondo, kiu okupiĝas pri la elsendoj, ni diskutas do pri la estonteco kaj kreo de io pli utila ol ĝis nun. Krom eblo aŭskulti aŭ elŝuti la malnovajn elsendojn, ekde komenco, en la akrivejo atingeblos aparte, same kiel ĉi tie, la plej interesaj sonraportoj kaj intervjuoj. Paŝo post paŝo ĉion tion ni ilustros pere de la fotoj kaj filmetoj faritaj dume... Por la fidelaj aŭskultantoj bona novaĵo!

Tamen ne nur pri la teknikaj ebloj en la reto ni diskutas. Estas multaj aliaj demandoj, al kiuj ni provas trovi sencajn respondojn. Apud trafeco kaj utileco de la retejo mem gravas ankaŭ la enhavo kaj tempo-daŭro de la programoj. Krome ni cerbumas kion fari, por ke la kontakto kun la aŭskultantoj fariĝu pli vigla kaj malferma ol ĝis nun. Jes, plej facile estus demandi pri tio tiujn, kiuj la programojn aŭskultas regule. Laŭ elŝut-statistikoj post tri jaroj temas pri impone granda rondo. Sed ŝajne same kiel mi vi konas la realecon de Esperantujo. Multaj prenas malmultaj redonas. La amikaro aŭskultas sed apenaŭ reagas. Kompreneble tio ne demotivigas nin agi - VVE ne travivus eĉ unu jaron se varolecon de la agado mi mezurus laŭ la reagoj :) Tamen opinioj, konsiloj, rimarkoj certe helpus al ni trovi pli bonajn ideojn evolui la elsendan agadon. Do, se vi havis paciencon ĝislegi tiujn ĉi-vortojn reagu, mi petas.

En tiu ĉi-retejo mi aperigados filmetojn, elektitajn elsendojn kaj diversajn aliajn sonmaterialojn. Nek laŭdojn nek kritikojn tamen mi atendas. Por ili estas la gastlibro. La plej urĝa demando koncernas tempo-daŭron de la programoj. Ĉu ili restu unu-horaj aŭ aperigadu en malpli longa formo? Aliajn diskuteblajn demandojn vi trovos pli frue, se vi atente legis, kion mi skribis.

Kreado de la nova retejo signifas evoluon. Mi scias, ke la esperantistaro pigras tamen certe viaj konsiloj helpos krei ion pli utilan, se vi ŝatas aŭskulti niajn programojn. Ne hezitu do kunkrei la evoluon de nia kuna futuro :)

Denove antaŭ la komputila ekrano...

nobody@ipernity.com (Irek Bobrzak) — Thu, 02 Oct 2008 18:11:05 +0000

Irek Bobrzak has added a post:

Fakte antaŭ la komputera, sed kelkaj geamikoj senĉese persekutas min pro konscia uzo de la malmojosa esprimo opiniante pri ĝi malmoderna. Sed komputera, komputora aŭ komputila laŭ la saĝaj fontoj samsignifas. Al mi, absoluta pigrulo teme de la fremdaj lingvoj lernado, plej plaĉas la plej proksimaj almenaŭ al la mia realeco esprimoj. Ja ankaŭ pri komputeroj profesie mi okupiĝas :)

Sed ne pri tio mi intencis skribi...

Antaŭ momento mi enretigis la sekvan muzikan intervjuon, kun Eduda Lee el Hongkongo, kiu dum kelkaj ĉe mi vizitoj ĉiam kantis libere, sen muziko, sen honto. Plezuro estis gustumi alkoĥolaĵojn kune :) Fakte rememori mi ne ŝatas. Pli ŝatas mi rigardi la futuron kaj revi, sed ĉi-kaze, same kiel laste kun Rogener kaj Alejandro, la vizito eniris mian memoron kortuŝe. Ĉar mi ŝatas muzikon, ĉiuspecan, se enordas. Oni diras en la pola proverbo: per stomako al la koro. Por mi pli taŭgas: per la oreloj. Kaj estas io en tio. Se temas pri mi sendube :)

Aŭskultu la intervjuon, kiu same kiel farita je la 4a nokte kun Ĵomart kaj Nataŝa en Italio jam delonge estis ekster la reto.

Eruda ne nur kapablas bele kanti. Sed pri tio eble iam, ĉe la alia okazo :) ... Varsovia Vendo!

La komenco

nobody@ipernity.com (Irek Bobrzak) — Wed, 01 Oct 2008 19:03:24 +0000

Irek Bobrzak has added a post:

Kelkaj geamikoj demandis, kial vi ne videblas ankoraŭ ĉe Ipernity? Do jam mi videblas. La vorto fariĝis karno... Damne! Kiel trovi min en la nova tasko, laŭ deziro de miaj geamikoj, dum kiam mi uzas en la reto samtempe kelkajn tuj-mesaĝilojn, prilaboras du ttt-ejojn, zorgas pri Facebook, de tempo al tempo kreas la filmetojn kaj radio-elsendojn, prizorgas mian ĝardenon, organizas ASon, preparas min al kunorganizado de la venontjaraj IJK kaj UK (la junulara programo), intertempe vojaĝas kaj purigas la hejmon (kion same kiel vi ŝajne mi ŝatas), se mi ne menciu pri ĉiutaga laboro kaj mia ŝatata emo spekti filmojn? Ĉu vi jam perdis vin en la tro longa demando? Ŝajne mi perdos min en la respondo, kial trovi por ĉio tio tempon kaj en tio ĉio ankoraŭ vivi normale. Ja ne pri ĉio ankoraŭ mi menciis :) Ĝuu do mian kroman ekekziston en la reto! Se diligente vi min provokos, eble la paĝo gajnos mian pli grandan atenton ol nun. Salutoj al vi ĉiuj!