Posts from Alejandro Cossavella

Novtipaj tostoj

nobody@ipernity.com (Alejandro Cossavella) — Tue, 15 Dec 2009 16:20:26 +0000

Ĉio ŝanĝiĝas, moderniĝas... por resti aktualaj kaj freŝaj ni bezonas konstante renovigi ĉion nian (ĉefe tion, kio ne renoviĝas per si mem). La finjaraj tostoj ne estas escepto. "Pacon kaj amon". Tiuj vortoj jam tiom da fojoj estis eldiritaj dum familiaj renkontiĝoj ke ili perdis la realigan povon. "Finan venkon". Ambaŭ malbelaj. Fino de la esperantumado. Venko super kiu? Ĉu iu perdis? Ĉu tio estas motivo por feliĉo? "Daŭran ĝuadon" aspektas pli bone...

Nu, se vi havas sugestojn por novtipaj tostoj, ili estas bonvenaj ĉi tie. Malnovtipaj bondeziroj ankaŭ bonvenas. Mi estas revoluciema sed ne fanatikulo...

Mia propra propono ne tiom bonas sed povas helpi kiel ekzemplo:

"Ke la verdo de nia flago ne estu tia de la fungoj kreskantaj sur humidaj rokoj en malhelaj kavernoj, sed tiu de la ŝosoj soifantaj sunleviĝojn kaj brizojn printempajn."

Mi havas nenion kontraŭ fungoj, humido, rokoj aŭ kavernoj... pro tio mi diras ke mia tosto ne tute bonas... ĉio havas sian lokon en ĉi mirinda kaj mistera universo...

ĉion bonan por la venontaj tagoj kaj jaroj, kaj por ĉiuj spacoj transtempaj, netempaj...

Plej amike kaj bondezire

el la sudo de la mondo

Ale.

La revolucio en pajleraro

nobody@ipernity.com (Alejandro Cossavella) — Sun, 22 Nov 2009 14:08:33 +0000

Alejandro Cossavella has added a post:

Teknologio -samkiel preskaŭ ĉio ekzistanta- havas aspektojn pozitivajn kaj negativajn. Ĉi kaze, dank´al ĝia evoluo, Vinilkosmo kapablis eldoni diskon senkorpan, kompilantan ĉiujn miajn ĝis nun ne eldonitajn kantojn: Revolucio en pajleraro. Por pliaj informoj kaj eventualaj elŝutoj bv. viziti:

http://www.vinilkosmo-mp3.com/revolucio-pajleraro-c-74_111_143.html?language=eo (esperante) http://www.vinilkosmo-mp3.com/revolucio-pajleraro-c-74_111_143.html?language=en (english) http://www.vinilkosmo-mp3.com/revolucio-pajleraro-c-74_111_143.html?language=fr (francais) http://www.vinilkosmo-mp3.com/revolucio-pajleraro-c-74_111_143.html?language=es (español)

Plej muzikajn salutojn,

Ale.

Esperanta komunumo

nobody@ipernity.com (Alejandro Cossavella) — Mon, 12 Oct 2009 08:00:00 +0000

Alejandro Cossavella has added a post:

Ĉu vi ŝatus loĝi en esperanta komunumo? Ĉu vi kredas ke eblas? Kio bezonatus por tion fari? Kion mi proponas al tiuj kiuj interesiĝas pri la ideo estas krei demandaron kiu helpos nin pli bone kompreni kiamaniere ĝin konstrui. Ekzemple:

Kie?

Kiuj?

Kion devus alporti la partoprenantoj? Ĉu difinitajn profesiojn, laborkapablojn, monon?

Ĉu estos memstara ekonomike aŭ enmerkatigos produktojn kaj/aŭ servojn produktitajn ene?

Ĉu funkcios en ĝi lernejoj? Kiajn?

Kiom da homoj partoprenus? Ĉu soluloj, paroj, familioj, ĉiuj?

Ĉu bezonatos reprezentantoj, estraranoj?

Nu, kion mi proponas estas ke ni kunkreu funkciantan realan komunumon. Ni havas la teknologion kaj supozeble la sciojn. Temas pri homoj el ĉiuj partoj de la mondo parolantaj minimume du lingvojn: tio estas trezoro! Ĉu vi ne sentas ke ni povus kunigi kapablojn kaj krei ĝin en la sama maniero en kiu Zamenhof kreis la lingvon?

Ni povus krei komunan paĝon ĉe Ipernity por diskuti la aferon. Ne eternan diskutadon pri la uzo de ita aŭ ata sed pri la konkretaj agoj kiujn ni devus efektivigi por ke ĝi ekzistu sane kaj ĝoje.

Mi atendas viajn reagojn.

Brakumon el la sudo de la mondo,

Ale.

PS: mi sugestas ke ni pensu unue pri la demandoj. Ili estas kvazaŭ patrinoj de la plej kontentigaj respondoj.

Prilabori la ripozon

nobody@ipernity.com (Alejandro Cossavella) — Wed, 07 Oct 2009 10:27:51 +0000

Alejandro Cossavella has added a post:

Ĉar mi ne scias kiom longe mi spiros sur ĉi mirinda planedo, mi devas senhalte malstreĉigi miajn nervojn kaj lerni la misteran arton de l' neniofarado ista. Jes, sed ĉar eĉ la plej subtilaj movoj de l' vivsubteno nepra malpacigas la nirvanecan trankvilon de mia konscio laga, mi devas ĝin protekti per paradoksaj rimedoj brutalaj: serĉi la bruon kiam mi emas silenti, lavi telerojn najbarajn kiam siesto min allogas kaj trajni ien ajn kiam mi burĝe bonfartus hejme.

Kanzonaro

nobody@ipernity.com (Alejandro Cossavella) — Tue, 07 Jul 2009 18:19:04 +0000

Alejandro Cossavella has added a post:

Sen ajna cel´

Ho! Kia konfuz´

Kien iris ĉiuj? Kien mia muz´?

Ho! Kia kaptil´

Noktas ja malhele sed videblas via bril´

Sola, sen ajna cel´

Neniam havis eŭrojn en la konto de F.E.L.

Sola, en alia dimensi´

Ĉu en via planedo estas loko

Por mi, kaj vi, por ni? Por ni...

Ho! Kia princin´

Dolĉa kiel mielo

Kaj enmane kapuĉin´

Ho! Kia liber´

La koroj en la ĉielo

Kaj la piedoj sur la Ter´

Em7 / C9 / A7 / C9 / X2

G / Am / Bm / Cadd9 / X2

Bm7 / Cadd9 / X4

La vino de l´ forges´

Oni diras ke dum ĉi tiuj festoj

Vi tiel sovaĝas ke ne plu memoras

Kun kiu vi dancas, kun kiu vi parolas

Oni diras, ke...

En ajna kastel´ mi fariĝos via reĝo

En ajna dancejo DoĴo

En ajna ĝangal´ mi fariĝos serpento

En ajna kazino, krupier´ de via kor´

En tiu ĉi marema ŝip´

Vi trinkos la vinon de l´ forges´

Kaj ebriiĝos lante

en ĝia sorĉe freŝa ama briz´

vi dancos, kaj nur poste diros: ĝis!

Oni diras ke vi multe vojaĝas

Sed neniam sentas vin hejme

Oni diras ke vi kuŝas sendorme

Kaj ploras, hej...

Dm / Bb7 / X8

Gm / A7 / Dm C / Bb / X2

Gm / A7 / da capo

Paco pipoj

Fruktoj en la arboj, ondoj en la mar´

Surtera paradizo por ĉiu homa par´

Venu ĉi tien, etas dom´

sed grandas am´

Jenas la somero plena je dezir´

Ŝika ĉarmulino, magia eliksir´

Ĉe la plaĝo, paco pipoj

Ĉe la ĉambroj, molas lipoj

Dum la vesperiĝo ne birdu en la nest´

Ĉar venos La Druido: la plej natura fest´

F#m B / X4

A E / F#m / G Bm / E / X2

Ponto: D / A / E / B / X2

Ni Gustumos la fruktojn

Perditaj en la mezo de l´ ĝangal´

Ili verŝas akvon sian sur la teron

Ridetoj en vizaĝoj ĝentilaj

Kreskas kiel floroj en somero

Aventur´, plezur´, amaraj, dolĉaj luktoj

Venu ĉe mi kaj ni gustumos la fruktojn

Sencele ni vagadas tra la arbar´

Bonŝance ni ne trovas multajn bestojn

Sovaĝaj ni promenas trankvile

La zorgojn ni postlasis en la kestoj

Em9 / Cmaj7 (6- 5min) X4

Am7 / B7 / Cmaj7 / A7 inv / Cmaj7 / B7* /

Ponto:

Em / C / X2

G / Am / G / Am / G / Am / G Am B7 /

Silento

Inter la vortoj ajnasencaj,

ene de la litero O

Ene de la infanaj koroj,

sub la ondoj de la mar´

Nun la suno brilas

Nun la tero, la akvo, la flamo

La birdo en la aero, la aero, la aero...

Mi parolas al vi gereĝoj: ĉu vi estas tie?

Ĉu vi estas hejme?

Em C / % / Am B7 / Cmaj / A inv / C B7 / X2

Am / Am6-11 / X6

F / D inv / G / E inv / Am / B7+9 B7-9 /

Varsovia vento

Kiam blovas vento tia, kiel la varsovia

la homoj plej ĝoje kunvenas

ne rusoj kun poloj, sed homoj kun homoj

plenaj je espero alvenas

Kia ĝojo spiri tiun venton liberigan!

Kia ĝojo! ĉar blovas nun la vento varsovia

Varsovia vento, kunportu nin al lando de fratec´

Ĉar ni sopiras nekonatajn geamikojn

kiam luno plenplenas en la ĉiel´

kej se ŝlosiloj rompiĝas, ni malfermas fenestrojn

por bani nin en la varsovia vent´

Nur melodio

Ĉe la fin´ ni samas, nur melodio

Hela lum´, ridoplena vivo...

Nun ni flosas, nun ni brilas, nun ni amas

Kaj ĉe la fin´, ni samas...

Gmaj7 Bbdism / Bm / Cmaj7 / Bm /

C / C#dism / Am / D /

Am / D / X6

Are

Are venas la homoj

venas are

Kial?

Ni ne demandas tion

ili venas are

Are, are venas, la homoj

Emaj / C#m7 / F#m7 / B7 / X2

E9 / A maj Am7 / G#m7 C#7 / F#m B7 / E B7 /

Klon´

Via klono

Diboĉema

Amuziĝas

Via klono

Nevideble

Ekscitiĝas

Glisas ĝis la mar´

Drivas plej serene

Ginseng´

Hong Kong

Havena Bu´

Via klono

Per ĉantaĝo

Pliriĉiĝas

Via klono

Esotere

Aliiĝas

Cm / Fm / G7 / Cm G7 /

Cm / Fm / G7 / Abmaj / Dm7-5 G7/

Abmaj / Abmaj / Fm / G7 / Abmaj /Dm7-5 G7 /

Kroma sun´

Leviĝas kroma sun´ el la velura horizont´

Kiam vi parolas ruse

Delire ni eliras el la mensa labirint´

Kaj plej lape revas kune

Lirlas roj´, floras tener´

Jasmen-parfumon kunportas l´ aer´

Brilas vi, libera juvel´

La plej bela gemo de l´ senfina ĉiel´

Vringus mi la vortojn ĝis nuanca elĉerpiĝ´

Se naskiĝus nun poemo

Sed per la rigardo kompreniĝas la mesaĝ´

De la plej natura emo

G D / Em / C Am / D / X2

C / Em / Bm7 / Am9 D9 / X2

Hej!

Blablai senĉese, babili,

paroli senfine, kondukos nin nenien

Virtuala tuŝado, retamindumado

maŝina, kondukos nin nenien

Agi ja nepras amikoj

Por ke l´mondo ne aĉu tiom multe

Meze de l´voj´ de la vivo

Ni agu kaj vidu

Hej! Ek al batal´ kaj diru

Hej! Ek al la viv´ kaj diru

Hej! Ne desperu

Nun estas nia vic´

Intro: G C / D C /

G C / G C / G C / D / X2

Em D / C / X3 ..... Am / D /

G D / C / X3 …. Am / D /

Simplas am´

Ĉerizarbo, paca rojo

Grandaj urboj laŭ la vojo

Jokohamo, Japanio

Neĝe blanka, sunradio

Ho! Vere simplas am´

Jenas nun, jenas ĉiam

Samurajo, gejŝo, maro

Teon trinkas olda paro

Jokohamo, Japanio

Vivrivero, zenavino

Gmaj / Em / C / D / X2

Gmaj Ebdism / Em / C / D /

Gmaj Ebdism / Em / C C#dism/ D7 /

G A / C / X10

Tuj

Kiel el ia kosma pupteatro

Ekaperas granda, ronda, ruĝa la lun´

La bonaj moroj tute forgesiĝas

Kaj ni libere dancas sub la luna lum´

Tuj, tuj, tuj

Ni banas nin en la plej freŝa vento

Tuj, tuj, tuj,

Ni malaperas, restas nur la sento

Ne per tiu trajno ni atingos nian hejmon

Ne per tiu trajn´, ne per ĝi

Nek tiu aviadilo nek la busoj de la mondo

Nek la plej rapida velboat´ (kunportos nin hejmen)

G / Bm / C / G / X2

C / Bm / Am / D / X2

G / C / G / C /

Preferindus

Pro tio ke vi neniam antaŭe

vidis urson promenante surstrate

Tio tute ne signifas ke ili ne ekzistas

Pro tio ke vi neniam antaŭe

aŭdis la sonon de atombombo

Tio tute ne signifas ke ili ne ekzistas

Sed preferindus ke ursoj ne promenu surstrate

Kaj ke atombomboj malaperu de la surfaco de la tero

Pro tio ke vi neniam antaŭe partoprenis KEFojn

Tio tute ne signifas ke ili ne ekzistas

Pro tio ke vi neniam antaŭe

diris la vortojn “mi amas vin”

Tio tute ne signifas ke amo ne ekzistas

Sed preferindus ke vi partoprenu KEFojn

Kaj ke vi amu ĝis malamo malaperos de la surfaco de la Tero

Em / % / Cmaj7 / % / Em / % / X2

Am7 / B7 / X2 Cmaj7 /

Ponto: Em / % / Fmaj7-5 / % /

Bona espero

En Bona Espero ni loĝas

pace kaj en harmoni',

tiun trezoron ni havas

kaj emas donaci al vi.

Mildaj leviĝas la voĉoj

al ĉielo: blua senfin'.

Ame laboras la manoj.

La Tero: nia patrin'.

Kantu kun ni dum la tago

Ludu kun ni je l' vesper'.

Hela la lum' de la amo.

Brilas la lum' de la ver'.

En Bona Espero ni loĝas

pace kaj en harmoni',

tiun trezoron ni havas

kaj emas donaci al vi.

ĉirpas la griloj ekstere,

noktas sur Monto Balen'.

Baldaŭ revenos la suno,

hela la lum' de l' maten'

Akvo

Ploras virin´

kiu eliris el la reto

Sen ajna mesaĝ´,

falas la pluveto...

Akvo

Griza la strat´,

griza la memoro

Mildas la plor´,

malmolas la doloro...

Akvo

Venu, revenu

Kien vi foriris mia amo?

Likas la kran´

estante jam fermita

Forglitas la gut´

saltas devigita

Am D inv / Dm inv / X8

C / D / X4

La Pordo

Ege grandas distanco inter dirko kaj ŝlosil´

Sed proksimas ja la pordo senserura de la anim´

Se iu malsatas, kiel povas manĝi mi?

Ĉu ni estas gefratoj aŭ estas nura fantazi´?

Sur tiu ĉi vojo malmultaj promenas

Ankaŭ mi ne kuraĝas kaj subite svenas

Kia son nin liberigos?

Kia lum´ vidivigos nin?

Kies kor´ ne malfermiĝos

kiam am´ kreskos en ĝi?

Ĉu ni estas gefratoj aŭ estas nura fantazi´?

Estas eta distanco inter sonĝo kaj vekiĝ´...

G D / Em / C F / G /

G D / Em / C F / Em / D /

C / D / X4

Am9 / Bm11 / X3

Am9 / D9 /

G D / Em / C F / Em / D /

G D / Em / C F / G /

La sistemo

La sistemo plej aĉe perversas

Kaj lukti kontraŭ ĝi nepras, karaj amikoj

Sed ĉar plej bona sterko ĝi estos por nia ĝarden´

Ni kreskigos tie florojn

Ĉar malamo ne povas sin nutri per la am´

Ĝi fariĝas veneno mortiga en ĝia sang´

Finfine la paco regos tutcerte sur la Ter´

Tio estas neevitebla

Sed ni devas kuraĝe batali, ĉiutage, kara amik´

Kun espero kaj kun ĝojo

Por ke ĝi okazu plej baldaŭ

Por ke ni ne devi atendi plu

Por ke la ridetoj de l´infanoj

Lumigu tuj la tagojn sub la sun´

Em / D / C / B / X2

C / B / X4

Em / D / C / B / X2

C / B / X4

Ponto: Am7 / D9 / X4 C / B / X4

La Druido

Druido, herbo-rikoltanto

Druido, natura-kuracanto

La Druido venis de l´ malproksim´

Por helpi nin

Kantas nia kor´: ni ne bezonas plori kaj atendi plu

Ho! Kia, kia ĝojo!

Ĉar la Druido...

Ĉu esti aŭ ne esti? Tiel staras nun la demando...

F#m...

F#m / C#m / D / C#m / X2 ... D E /

A E / Bm / E / X2

Via vio

Via revo, via ver´

Via vio, via

Via ĝojo, via ĝu´

Via vio, via

Ho! Ne forgesu vin

Nur vi povas fari tiun miraklon

Via larmo, via rid´

Via vio, via

Via animo, mia am´

Via vio, via

Am9 Bbmaj7 / X8

Fmaj7 / Dm7 / X4

E / F / X2

ĵoker´

Stinkas ĉi pingven´

Nube ĵetas sin

Pro instinkta em´

Abismen

Kia damna best´

Similas ĝi al mi

Eterna dromedar´

Perdita

Sin´, zon´

Tintas glasoj

Zip´, ŝos´, ĵoker´

Omen´

Palas ja la silk´

Odoras je incens´

Brosas vi la harojn

De l´ ĉeval´

ŝaume kuŝas ker´

Pikas ĉe la tref´

Trempas en ĉampano

Karoo

Malfide (Pappo)

Sen ajna kial, imagis mi

Ke pace ni kunas, kia bela sent´

Sed jenas mi nun, tiel sola en la vivo

Ke plej taŭgas forir´

Malnova blus´, sopir´ kaj memor´

De momentoj pasintaj, ĝuoj de l´amor´

Sed jenas mi nun, tiel sola en la vivo

Ke plej bonus mi for

Homo de l´ suburbo (Pappo)

Alvenis ja la tempo en ke la homaro

Vivas sen ajna cel´

Per malmulto da vortoj, problemojn povus solvi tuj

Sed homo frapas pugne kaj detruas ĉion

Li kredas sin genia pro sia personec´

Homo sen paseo, sen tempo kaj memoro

Agi tiel povas nur

Sed li ne finkomprenas ke lian memon vendas ja

Kaj l´homo del suburbo sekvas la rutinon

Tute ne konscia pri l´fino de sia viv´

Ĉe Montpellier

Somero tra la lando de la vitoj

La luno tra la ĉielo de la homoj

La homoj tra la lando de la steloj,

Ĉe la bela Montpellier

La vinon la virinoj verŝas milde

Ridetoj ĉe l´frataro ekaperas

Vortoj el kompreno flugas ĉie

Ĉe la bela Montpellier

Frateco batas en la kor´

Vortoj en la vento

Civilizacio

En tiu ĉi sovaĝa laberinto

Oni povas sin facile orienti

Civilizacio kaj aliaj mensogoj

Eble vi jam spertis tion

La etaj formikoj laboradas

En lanta vic´ konstanta vic´ konstanta

Dum vi dormas trankvile

En mola lit´ kuŝanta

Eble vi jam spertis tion

La fajron vi povus ekbruligi

Kaj demeti elegante la vestaĵojn

Plenigi la glasojn per suko de l´ vinbero

Kaj festi ĝis la mateno

Dm C / Dm / Bb F / A7 /

Bb F / A7 Dm / Bb C / Dm / Bb C / Dm /

Amo virtuala

nobody@ipernity.com (Alejandro Cossavella) — Fri, 03 Jul 2009 09:31:47 +0000

Alejandro Cossavella has added a post:

En mutaj polmoj etendiĝas la prunoj de l' somer'. Kaŝe via, mi naskiĝas ĉiutage al hazardaj renkontiĝoj virtualaj. Kiom longe daŭros ĉi agonio plasta, lada, vana? Mezvoje al infer' banala de l' agoj rutinaj, mi aliiĝas -bonŝance- kaj delfene karesas la marbordojn de via korpo fizika. Dum miaj tagoj surteraj mi malfermis multajn pordojn, sed malfermi la fenestrojn de viaj kruroj miraklivaj, mi ne povas. Kia ironio! Tiom proksime kaj tiom for...

Esperbusoj

nobody@ipernity.com (Alejandro Cossavella) — Fri, 23 Jan 2009 17:44:51 +0000

Alejandro Cossavella has added a post:

1- Homoj (tion ni havas…)

2- Busoj (fabrikanto de veturiloj tiaj povus interesiĝi pri la eventuala propagando devenanta el vojaĝoj supozeble tre komentataj)

3- Sponsoroj (trinkaĵoj energidonaj, asekurkompanioj, radoj, manĝaĵoj, telefonkompanioj, ktp, ekz.: “en la buso sufiĉas Esperanto, sed por paroli hejmen, bezonatas MOVISTAR”)

4- Reto da organizantoj surlokaj (tion ni devus havi…)

5- Amaskomunikiloj

La itineroj devus esti sufiĉe allogaj laŭ ĵurnalista vidpunkto, ekz.: Barcelona-Moskva, Amsterdam-Beijing, ktp.

Oni povus fari filmon kaj/aŭ verki libron pri la aventuroj (mi uzas la pluralon ĉar eventuale povus vojaĝi pluraj samtempe. Eĉ Esperŝipoj…)

Nu, jen la ideo. Ke pluraj riĉiĝu per ĝi!

Pri "Atlantika marbordo"

nobody@ipernity.com (Alejandro Cossavella) — Mon, 12 Jan 2009 20:23:32 +0000

Alejandro Cossavella has added a post:

Temas pri ambicia projekto (ĉu neŭtrala lingvo internacia ne estas tia?) antaŭvidita por la jaro 2010. La celo estas ke trupo de geaktoroj kaj muzikistoj vojaĝu per buso inter la urboj Buenos Aires kaj New York (Bonaero-Novjorko). Se poste kunordigiĝas la Pacifika marbordo, ni revenos tra alia vojo. Teatraĵoj, muziko, prelegoj kaj lingvo internacia. Sponsoroj, ideoj kaj proponoj: plej bonvenaj!

Kial la jaro 2010? Ĉar la buso devos halti en Kubo, por la UK!

Nu, jen la ideo. Poste la laboro. Espereble iam ĝi realiĝos.

ĝis

Ale

Video

nobody@ipernity.com (Alejandro Cossavella) — Wed, 24 Dec 2008 13:00:00 +0000

Alejandro Cossavella has added a post:

Tempo katas sed vivo TGV-as

nobody@ipernity.com (Alejandro Cossavella) — Fri, 19 Dec 2008 16:54:31 +0000

Alejandro Cossavella has added a post:

La ondoj de la maro kunportis nevideblajn botelojn kun mesaĝoj ene. La mesaĝo estis ĉiam la sama: nun, nun, nun. Tio okazis en La Ciotat, urbo en kiu la fratoj Lumiere malkovris la eblecon projekcii bildojn tiel ke ili aperu kvazaŭ realajn: la komenco de kino. En La Ciotat ankaŭ troviĝas la unua salono en kiu oni pagigis la homojn por spekti tiujn filmojn. Nu, antaŭ kelkaj tagoj mi revis pri mia unua kaj nura filmo. Temus pri paso de TGV tra stacidomo: silento, paso de la TGV, silento. Certe ne gajnus premiojn, sed kia ĝojo por tiuj kiuj amas ĉi misteran aventuron! Unu el la unuaj filmoj de la fratoj nomiĝis "Alveno de trajno".

Ŝanĝante la temon, tiuj sekvantaj mia foto kroniko pri la turneo konstatis ke jam de longe ĝi ne aktualas. Mi devis ŝpari miajn fortojn por povi koncerti kiel eble plej bone, por povi malaperi kaj permesi ke la mesaĝo transdoniĝu kiel tiu de la ondoj maraj.

Antaŭ ol forlasi la varmon hejman por eniri la vintran nokton Lionan survoje al KTP (trinkejo esperanta), mi ŝatus danki plej elkore al tiuj kiuj helpis en la realigado de ĉi intensa turneo espomuzika:

ARKONES (Artaj Konfrontoj en Esperanto), Poznan, Pollando. Estas tiuj kiuj ekbruligis la fajron!

Floreal Martorell: respondeculo pri la eldonado de tiom multe da Emuziko, ke nur pro tio muzikistoj kaj muzikŝatantoj devus akompani min en la dankadon. Krome, kaj interalie, li bonege kunordigis ĉion kunordigeblan por ke la vojaĝo estu kiel eble plej agrabla.

Lars Sözüer: li skribis por mi manifestojn kiuj permesis ke mi malstreĉiĝu kaj ĝoju. Nur ilin legante, ĉio funkciis.

Al ĉiuj gastigantoj! Sen ili, la afero ne funkcius. Aŭ ne estus tiom agrabla. Ĉe ili mi retrovis fortojn kaj kuraĝigon, ripozon kaj amikecon, kiam mi tion plej bezonis. Ne tiom simplas la ĉiutagan vojaĝadon kaj koncertadon, kiel mi supozis. Pro tio: dankon, karaj!!

Al la Kataluna Kongreso de Esperanto kaj, anticipe, al IS, IF kaj NR.

Kaj al vi, kompreneble!!

Eble vi ne scias kio estas TGV. Temas pri trajno tre rapida.

Mi devas foriri. Bv; pardoni min se la teksto estas iom konfuza sed mi devis skribi tuj, nun kaj jam.

sed ĉiam elkore!

plej amike,

Ale.

Kata ton daimona eaytoy

nobody@ipernity.com (Alejandro Cossavella) — Mon, 08 Dec 2008 20:35:00 +0000

Alejandro Cossavella has added a post:

Li restis fidela al sia propra spirito. La cetero estas literaturo.

Ĉu siesti aŭ ne siesti?

nobody@ipernity.com (Alejandro Cossavella) — Wed, 19 Nov 2008 12:51:02 +0000

Alejandro Cossavella has added a post:

La plej gravaj homaj demandoj ofte simplas. Ekz: ne ĉefrolas la poezinivelo de homo, kiam vi intencas kundormi. Plej gravas scii ĉu la alia ronkas aŭ ne, ĉu li aŭ ŝi eltiros vian kovrilon aŭ ne. Ĵus reveninte el la Kataluna Kongreso en Sabadell, mi atendas la lavmaŝinon por poste atendi la sekmaŝinon por esti preta por plenigi la valizon per novaj aventuroj. Tiuj kiuj povas kaj deziras trovos plenan kalendaron de la turneo ĉe http://turneoj.wikispaces.com/Cossavella+2008#kalendaro

pacon, amon kaj ridon,

Ale.

Koroj kiel lampoj

nobody@ipernity.com (Alejandro Cossavella) — Sat, 15 Nov 2008 10:23:23 +0000

Alejandro Cossavella has added a post:

kiel ĉevaltrajnoj senbridaj, fulmrapidaj. Pasiaj koroj sangantaj, vivaj. Heroldoj de tempoj estontaj, pioniraj koroj amontaj, Nu, koroj por kiuj la brusto ŝajnas ne sufiĉe grandi. Teneraj muskoloj sensciaj, naivaj rajdantoj de l' verper'. Giganta batado varma, efemereterne zigzaga. Ĝojpur' blanka, oblikva, ruĝa. Ho! Koro festema, de l' temp' ebria: kantu plej ĝoje en ĉi maten' anima. Malaperigu limojn de l' materi' betona kaj disradiu vi la kanzon' belsona.

En la ruĝaj stratoj de Hamburgo

nobody@ipernity.com (Alejandro Cossavella) — Mon, 27 Oct 2008 13:44:07 +0000

Alejandro Cossavella has added a post:

Li pagis sian dozon de beleco. Kvazaŭ flava submarŝipo brua, li postlasis siajn semojn en ujo kaŭĉuka. Evidentiĝis tiam -subite, tuj- ĉiuj malfortaĵoj de la sistemo, kaj ĝi rompiĝis antaŭ siaj pacaj okuloj kvazaŭ sekaj branĉoj sub elefanta paŝo. Poste kirliĝis la trajnoj kun la homsvarmoj, la tagoj kun la ne plenumitaj promesoj, la teo kun la ĝisoj kaj ktp... el tio ekestis blanka floro, pura, kiu, post sekundoj, ankaŭ malaperis, kiel ondoj en la maro de l' forges'.

Dume vi feriis, vi dormis en la ĝangalo de la necerteco.

Mi... nu, mi rigardis tra la fenestro kaj la suno brilis, do, mi decidis promeni.

Liberiĝo el la katenoj de sovaĝa kapitalismo

nobody@ipernity.com (Alejandro Cossavella) — Sat, 16 Feb 2008 16:24:57 +0000

Alejandro Cossavella has added a post:

Dum unu el miaj koncertoj por ne esperantistoj en la Kanariaj Insuloj, mi ricevis donace ĉapon bufonan kies foton vi povas vidi sube. Mi decidis kunporti ĝin por helpi la homojn en ilia liberiĝprocezo de unu el la plej evidentaj simboloj de la konsumsocio: mono. Dum kelkaj parolas pri financa aŭ ekonomia krizo, aliaj vendas mamzonon ornamitan per diamantoj kun prezo de 5 milionoj da dolaroj. Kaj la klimatŝanĝo? ni vidos...

Iu homo kiu gajnis la loterion diris ke post ricevo de la mono li havis pri da problemoj ol iam ajn en sia vivo kiel malriĉulo. Ke li preferus ne esti gajninta, ke la mono estas ŝarĝo. Memkompreneblas ke mi ne kredas tion. Se tiel estus, li donacus la monon kaj la aferon estus solvita. Aŭ temas nur pri avidoproblemo? Ĉiuokaze mi deziras esti preta por helpi lin aŭ aliajn en lia situacio. Mi kunportos la ĉapon liberigan...

Se vi havas problemojn pro troa riĉeco, ne hezitu kontakti min. Mi havas ideojn tre kreivajn. Eĉ pli ol fabriki mamzonon kiu kostos 7 milionoj da dolaroj!

Nu, ŝanĝante la temon. Ekde nun, mi ne scias kiom ofte mi povos eniri la reton kun tempo por alŝuti fotojn aŭ respondi mesaĝojn. Sed ni restos enkontakte!

Plej amike,

Ale.

Perfekta cirklo

nobody@ipernity.com (Alejandro Cossavella) — Sat, 05 Jan 2008 18:36:30 +0000

Alejandro Cossavella has added a post:

Antaŭ kvar monatoj, en Bariloche (argentina patagonio), adiaŭis min la neĝo vintra. Hodiaŭ mi alvenis al Dresden (Germanio, lasta urbo de la turneo), kaj ĉio blankas simile. Fermiĝas tiel perfekta cirklo transnacia, turnea kaj muzika. Mi ege feliĉas pro ĉi tiu sperto, pro la bonaj kaj la ne tiom bonaj momentoj. Finfine, ĉiuj kune kreis la harmonion plej misteran, la vojaĝon realan.

ĉion bonan por la jaro 2009!

Ale

Ps: La suno brilas en Buenos Aires! Estas varme kaj mia korpo diris Dankon kiam mi kunportis ĝin al la rivero por malstreĉigi ĝin, por kurigi ĝin. La vojaĝo vintra estis bonega, sed nun... la suno.

Esperbusoj

nobody@ipernity.com (Alejandro Cossavella) — Thu, 01 Jan 1970 03:00:00 +0000

Alejandro Cossavella has added a post:

Per lingvo internacia interkompreniĝos homoj vojaĝantaj en la Esperbusoj. Ruldomoj transnaciaj, ambasadoroj de kulturo paca, vivantaj ekzemploj survojaj de la fama interna ideo. Tiuj busoj vojaĝos de urbo al urbo, prefere prezentante spektaklojn, prelegojn kaj/aŭ kursojn. Kio bezonatas por ke ili eku? 1- Homoj (tion ni havas…). 2- Busoj (fabrikanto de veturiloj tiaj povus interesiĝi pri la eventuala propagando devenanta el vojaĝoj supozeble tre komentataj). 3- Sponsoroj (trinkaĵoj energidonaj, asekurkompanioj, radoj, manĝaĵoj, telefonkompanioj, ktp, ekz.: “en la buso sufiĉas Esperanto, sed por paroli hejmen, bezonatas MOVISTAR”). 4- Reto da organizantoj surlokaj (tion ni devus havi…) 5- Amaskomunikiloj

La itineroj devus esti sufiĉe allogaj laŭ ĵurnalista vidpunkto, ekz.: Lisboa - Moskva, Amsterdam - Beijing, ktp.

Oni povus fari filmon kaj/aŭ verki libron pri la aventuroj (mi uzas la pluralon ĉar eventuale povus vojaĝi pluraj samtempe. Eĉ Esperŝipoj…)

Nu, jen la ideo. Ke pluraj riĉiĝu per ĝi!

Flugpoemoj

nobody@ipernity.com (Alejandro Cossavella) — Thu, 01 Jan 1970 03:00:00 +0000

Alejandro Cossavella has added a post:

Reveninte al Argentino mi elmanigis skribaĵojn tujajn kiujn mi disponigas al vi en ĉi solena akto de la akademio. Ne havas titolojn kaj ne estis lingve kontrolitaj.

Tra kosmaj kranoj

likas efemera la vivo likva

Jaroj kunpremiĝas

kaj maleksplodas

en sekundoj

kristale travideblaj

dum stevardinoj ridetas fake

verŝante la ruĝan vinon

sango de l´ tempo

en plastajn glasojn senesperajn

Flugi kaj ellasi

spurojn

en spacoj foraj

Tuŝi la mensojn

kaj la rozojn

Alproksimiĝi al praaj kaĝaj fabeloj

Kiel agloj

Magnetaj temploj estontaj

Preĝejoj de senfinaj emoj metalaj

Tuboj kaj havenoj

Flugantaj virtoj

subtilaj pekoj nuancaj

Kaj l´odoro de l´ Zubrovka

Bjalistoka

kuracilo lanta

Velur´ konsola

de l´ hotel´

higiena

Akustika fono

blinda torento

de mizero

Mistero seka

venanta el kie iam la dinosaŭroj trembligis la teron

sed ne plu

Kan´ vakua

bambua sorto atoma

Sola lago muta

atestanta tion

Mallaŭta lamo langa

Oma paradizo

silenta kaj joga

Kanibala festeno sanga

Ĉizitaj vizaĝoj rokaj

garantias konstantan feliĉon

en la prizon´ de l´ ĝoj´

Neniam brilas en ĝi mallumo

nur mortoj puzlaj

grapole nigraj

Tuja malpoezio

Bastarda ido de l´ enuo

Sensenca kunigo de literoj

Turo de ŝnuroj

Aŭ serpentoj

En ĉi mondo

kunvivas harmonie

am´ kaj hororo

Ĉi kolekto de

poemoj vomaj

blataj matenmanĝoj

naskiĝis sen klarigo

kiel kaktuso dezerta

kies pravigon

ne troveblas en vortaro ajna

Unu post la alia

la lipoj

kugloj celantaj la liberon

de l´ necio

alvenis al urboj neekzistantaj

kortuŝe forgesante

la stelojn kaj la radojn

Tiam la lupo LSDa enfaŭkigis la horloĝojn

kaj ni alvenis

subite

hejmen

Plezuraro

kies plenumigo

ŝuldiĝas al la morto

de ĉiuj fantazioj holivudaj

ne sufiĉus por pravigi

la ĝojon

kiun mi eltiras

el la simpla rigardo

de viaj okuloj

kiam vi dormas

Arta vesperto

vi scias ke

kelkaj ne komprenas

ke oni ne ĉiam povas diri la veron

sed en la mondo de la maloj

ekzistas bezonoj

nur satigeblaj per la nuligo

de alies emon