Posts from Karesema

Al miaj amataj geamikoj sur la planedo!

nobody@ipernity.com (Karesema) — Sun, 20 Dec 2009 19:44:07 +0000

Karesema has added a post:

Miaj karaj geamikoj,

Ĉar proksimiĝas Kristnasko kaj la Nova Jaro, mi sincere deziras, ke tiuj festoj okazu en plej harmonia kaj paca etoso kaj ke viaj proksimuloj estu sanaj kaj ĝojaj kaj ke viaj revoj kaj deziroj konkretiĝu kaj ke ni estu por ĉiam geamikoj.

Kisojn kun forta brakumo de Karesema.

8-A ĈINA KONGRESO DE ESPERANTO

nobody@ipernity.com (Karesema) — Wed, 16 Dec 2009 00:46:36 +0000

Karesema has added a post:

Salutojn Karesema. Jen mia raporto pri la Ĉina Kongreso.

Ĝis baldaŭ:

Â Â Â Â Â Â Â Â Â Â Â Â Â Â Â Augusto

Kara:

Por se eventuale vi pensas ke la artikolo estas aperinda mi sendas al vi informon pri la 8-a Ĉina Kongreso de Esperanto.

Elkorajn salutojn:

Augusto

-----------------------------------------------------------------------------------------------------------

8-A ĈINA KONGRESO DE ESPERANTO. KIAM ESPERANTO "INFANIĜAS"

Dum la 3-5a de decembro okazis en la bela kaj historia ĉina urbo Nankino (ĉina ĉefurbo de la kulturo), ĉe sia plej fama universitato, la 8-a Ĉina Kongreso de Esperanto, kun partopreno de ĉirkaŭ 400 esperantistoj de la tuta lando, krom kelkaj el aliaj landoj (Francio, Usono, Japanio, Tajvano, Hispanio, Irano..).

La programo estis interesa, kun allogaj prelegoj kaj prezentadoj. Ĉefe plaĉis al la ĉeestantoj la vasta uzo de Esperanto, ne nur surkoridore, sed ankaŭ dum la prelegoj kaj oficialaj programeroj, tute malsame de la antaŭa kongreso, antaŭ du jaroj en Kantono, kie praktike ĉio okazis en la ĉina lingvo, kvankam la partoprenintoj bone regis nian internacian lingvon. S-ro Wang, el Shanghai, publike, sur la podiumo, petis ke ekde nun ĉio okazu en Esperanto. Longa aplaŭdo sekvis lian proponon.

Se mi devus ion elekti kiel plej interesa kaj alloga parto de la kongreso estis la partopreno de esperantistaj infanoj. Du infanaj grupoj aktive kaj vigle partoprenis. La infanoj de ambaŭ grupoj bele kaj kuraĝe parolis kaj kantis en nia lingvo. La ĉeestantoj restis ege kortuŝitaj.

Unu el tiuj grupoj venis de la urbo Zhenjiang, de la provinco Jiangshu, de la lernejo Baotalu, kies instruistino estas Neĝeta (Shi Xueqin), kiu instruas tie Esperanton al la infanoj kune kun sia edzo, Michel Fontaine, franco. Ili estas bone konataj kaj eĉ ricevis belan memoran diplomon de Ĉina Esperanto Ligo, pro ilia granda helpo al la disvastigo de Esperanto en Ĉinio.

Ĉiuj ne nur ĝuis la prezentadojn de la infanoj, sed povis babiladi kun ili. Ili estas ĉarmegaj, kuraĝaj, diligentaj. Dum la dua tago de la kongreso Neĝeta kaj Michel faris kun ili provlecionon, antaŭ la publiko, kiuj estis agrable surprizitaj. En nia esperanta mondo troviĝas multaj teoriistoj de la instruado de Esperanto. Sed ni ĉiuj devus lerni de la instrumetodoj de Neĝeta kaj Michel. Vere ili estas talentaj instruistoj, allogaj, kiuj facile komunikiĝas kun la gelernantoj, kiuj, krom lerni bone, evidente amas tiujn admirindajn instruistojn. Ekde tiu tago mi, malnova instruisto, decidis ke mi devas ŝanĝi miajn instrumetodojn, kaj iomete "kopii" de ili. Dum tiu lecciono okazis ankaŭ reta babilado kun la brazila esperantsitino Karesema, ege simpatia, kaj kiu ankaŭ bonege komunikiĝis kun la infanaro. Ĉio ĉarmega. Bona etoso, feliĉaj infanoj, feliĉaj observantoj.

Pro tio mi antaŭe, en alia artikolo, diris ke "esperanto en Cinio plijuniĝas". Nun mi devus diri ke "Esperanto en Ĉinio infaniĝas". Kun tiaj geinstruistoj, kun tiaj gelernantoj, kun kuraĝaj homoj kiel s-ro Wang (kaj multaj aliaj) mi antaŭvidas brilan estontecon (eble jam estanteco) al la ĉina esperanto movado.

Augusto Caquero

Sur la foto aperas kelkaj el la geinfanoj, Michel, Neĝeta, kaj mi mem, kun la e-flago de la e-asocio de Foshan.

Google festas la Zamenhof-tagon

nobody@ipernity.com (Karesema) — Tue, 15 Dec 2009 12:32:23 +0000

Karesema has added a post:

Google festas la Zamenhof-tagon

Antaŭ 150 jaroj, la 15-an de decembro 1859, naskiĝis Ludoviko Zamenhof. Ne nur esperantistoj, sed ankaŭ Google solenas la festotagon. En la kapo de la ĉina, japana kaj korea versioj de la plej potenca serĉilo de la mondo aperis esperanta flago, kun ligo al serĉorezultoj pri Esperanto. La apero de Esperanta versio de la logotipo de Google ŝajnas esti rezulto de esperantista kampanjo. Simila logotipo aperis ankaŭ en multaj eŭropaj versioj de la serĉilo, kiam la 15-a de decembro atingis tien.

La serĉilo Google relative ofte modifas la aspekton de sia logotipo en la ĉefa serĉopaĝo depende de la sezonaj festotagoj en diversaj partoj de la mondo. Por uzi la ŝancon, esperantistoj dise en la mondo turnis sin al la firmao por peti, ke la firmao ne forgesu la 150-jariĝon de la iniciatinto de Esperanto.

La iniciaton inter la unuaj disvastigis la israela esperantisto Josi Ŝemer, kiu la 24-an de septembro dissendis al multaj adresoj mesaĝon kun la jena enhavo:

Kiel vi eble rimarkis, Google ofte metas ĉe sia hejmpaĝo iun specialan desegnaĵon por noti datrevenojn de historiaj okazintaĵoj, naskiĝoj de famaj personoj kaj simile. Ekzistas bona ebleco, ke, almenaŭ en selektitaj landoj (ekz-e Pollando), oni rekonos la 150-an datrevenon de Zamenhof la 15-an de decembro - se esperantistoj tion proponus. Bonvolu proponi tion prefere en simpla anglalingva mesagho ĉe proposals@google.com, kaj konvinki aliajn samon fari.

Proksimume samtempe la ideon disvastigis interalie la antaŭa prezidanto de UEA Renato Corsetti en la diskutlistoj de UEA. La kampanja mesaĝo estis disvastigita ankaŭ per la mikrobloga servo Twitter.

Josi Ŝemer asertas, ke la honoro ne apartenas al li:

- La iniciato ne venis de mi. Mi simple ricevis mesaĝon de iu esperantisto el Eŭropo (mi ne plu memoras de kiu...), petante pludisfamigi la aferon. Do, mi tuj dissendis ĝin al miaj 225 abonantoj de judaj ŝercoj kaj ankaŭ al ĉiuj 80 reto-havaj israelaj esperantistoj. Tiam Renato Corsetti - unu el miaj adresatoj - plusendis ĝin tra siaj retlistoj. Verŝajne multaj el la mesaĝ-legantoj skribis tiam al la redakcio de Google kaj jen la pozitiva rezulto! Mi vere ne scias kiu estis la iniciatinto, sed li meritas la plej grandan honoron, ne mi....

Je la 21.30 la 14-an de decembro laŭ la universala horo (UTC) la Esperanta flago videblis en la ĉina, japana kaj korea versioj de Google. Tamen ekzemple la barata, kazaĥia kaj rusia versioj de Google tiutempe ne montris la Esperantan flagon, kvankam en la koncernaj landoj jam komenciĝis la 15-a de decembro.

Kelkajn horojn poste la esperanta flago aperis interalie en la rusia, svedia, germania kaj francia versioj de la serĉilo, sed ne ekzemple en la britia aŭ finnlanda paĝoj. Ne estas tute klare, kiel funkcias la montrado de la flago, ĉar usonaj esperantistoj raportas pri ĝia apero ankaŭ en la ĉefa paĝo Google.com, sed se oni aliras la saman adreson el Svedio, tie ne videblas flago.

Tie, kie aperis la Esperanta flago, ĝi enhavis ankaŭ ligon al serĉorezultoj pri Esperanto. Tiel, sekvante la flagon en la ĉinlingva paĝo, oni povis trovi kronologion pri la historio de Esperanto, dum la japana versio gvidis ekzemple al la japanlingva Vikipedia artikolo pri Esperanto kaj japanlingvaj lerniloj.

FONTO: LIBERA FOLIO

El Popola Ĉinio / Revuo

nobody@ipernity.com (Karesema) — Thu, 10 Dec 2009 10:26:09 +0000

Karesema has added a post:

http://esperanto.china.org.cn/novajhoj/2009-12/09/content_19035710.htm

Mi ege ĝojas, ke mia artikoleto aperis en tiu serioza Revuo- El Popola Ĉinio.

Bonvole sekvu la ligilon.

Proksimaj je la koroj...

nobody@ipernity.com (Karesema) — Mon, 07 Dec 2009 15:38:28 +0000

Karesema has added a post:

Proksimaj je la koroj...

Malofte oni povas diri, ke homoj estas proksimaj je la koroj. Des pli se temas pri distanco de miloj da kilometroj. Sed fakte - se oni kalkulas la dimension de amikeco kaj sentemo, tiam oni povas diri ke la distanco NE kalkuliĝas, ĉar inter koroj validas la sentokapablo...

Antaŭ tri tagoj mi spertis pri tio pruvon.

Miaj geamikoj el fora Ĉinio invitis min foje partopreni perskajpan renkontiĝon kun ĉinaj gelernantoj de Esperanto en urbo Nankino.

Ĝi ne estis mia unua sperto tiurilate ; feliĉe mi jam partoprenis antaŭe similan provkurson.

Ĉifoje mia duonfranca kaj duonĉina amiko, Michel Fontaine, raportis ke okaze de la Tutlanda Ĉina Kongreso okazos perskajpa konferenco kaj li kun sia edzino instruistino Neĝeta ŝatus mian partoprenon. Kompreneble mi tuj konsentis.

Ju pli da varmeco en koro, des pli da vigleco en homa percepto... kaj tiel estu...

Ni interkonsentis kelkajn detalojn de la programo, kiu okazis kun mi aperanta sur la granda ekrano, dum la spektantoj povis rigardi kaj aŭskulti.

Paroli pri la emocio de mia partopreno ... estas por mi malfacila tasko. Mi ekvidis grupon da ĉinaj gelernantoj sur mia komputila ekrano helpe de mia kamerao. Ili ĉiuj aspektis feliĉaj kaj scivolemaj. Neĝeta, instruistino de la grupo, pofoje prezentis ilin al mi kaj ekis renkontiĝo per intersalutoj. Mi bone ekmemoris tiujn ĉarmajn geknabojn , entute 19 gelernantojn ok- kaj naŭ-jaraĝajn. Iliaj nomoj estis : Burĝona, Ĉielo, Fiŝo, Flora, Folia, Lago, Mara, Matena, Oceano, Ondo, Papilia, Ruĝa, Salika, San' , Stela, Suno, Terano, Tenera,, Jeanne.

En la klasĉambro krom gelernantoj kaj geinstruistoj ( Neĝeta kaj Michel ) ĉeestis : la organiza komitato de la Kongreso, fotistoj kaj fieraj gepatroj. Tuj post intersalutoj la perskajpa renkontiĝo glatis laŭ antaŭkonsentita plano.

- Mi montris kelkajn kolorajn objektojn kaj demandis : kia estas la papero ? Aŭ alia kolora objekto ? Kaj ankaŭ kelkaj gelernantoj faris al mi demandojn pri leciono. Kelkaj ordonis al mi : levu la dekstran manon, levu ambaŭ manojn, fermu okulojn, montru vian nazon kaj eĉ .. montru vian hundeton Pitokon...

- Nekredeble amuza momento venis kiam ĉiuj alproksimiĝis al la ekrano por rigardi mian Pitokon .. eĉ gepatroj kaj fotistoj alproksimiĝis. Poste...

-Venis la momento por kune kanti .. "Mi kaj vi ".

- Venis alia momento por ke mi kantu " Feliĉon".

- Fine venis bela momento kiam Ĉielo ( dekjara knabo ) ludis tipan ĉinan muzikan instrumenton .. kortuŝa momento.

- Je nia adiaŭo okazis kisoj, brakumoj, ĝis-revidoj .. kun la certeco ke ni estas amikoj proksimaj je la koroj kaj neniu ajn distanco apartigas nin unuj de aliaj - ĉar la distanco estas nur la geografia detalo.

- Mi nun avide atendas pluajn perskajpajn renkontiĝojn kun miaj gefrataj geamikoj...

- Karesema.

Por ke la tagoj de la homaro estu pli lumaj.

nobody@ipernity.com (Karesema) — Sun, 06 Dec 2009 12:14:16 +0000

Karesema has added a post:

Mi aĉetis tiun ĉi libron...Mi ĝin konsilas al vi.

Respektinda virino. Granda animo ĉu iom naiva?

Se fotojn oni vidas pri Lidia Zamenhof, ĝene povas malhelpi nin bone rigardi la tiama modo: virinon ni vidas en ege eksmodaj vestaĵoj – kiuj ja supozeble estis tre laŭmodaj tiutempe. Ĉar se io certas, tiam ja, ke Lidia Zamenhof staris firme en sia propra epoko; ŝi ne estis „eksmoda”.

Ŝi vidis la minacojn, sed ŝi ankaŭ vidis multajn eblojn por strebi al bono. Ŝi vivis en fido al Dio, kies signojn kaj mesaĝojn ŝi kredis trovi en la revelacioj de Bahaismo.

La volumo estas kompilaĵo de ĉiuj ĉi-momente konataj originalaj tekstoj de la plej juna filino de L. L. Zamenhof: eseoj, artikoloj, paroladoj en kunvenoj kaj antaŭ radiomikrofonoj, kaj rakontoj. En la dua parto troviĝas la retrovitaj leteroj.

Leteroj kaj recenzoj

Jam en 1980 – same en Antverpeno, sed ĉe TK/Stafeto – aperis de Isaj Dratwer la kompilaĵo Lidja Zamenhof; vivo kaj agado. En ĝi krom mallonga enkonduko kaj kelkaj fotoj la ĉefan rolon havas pluraj leteroj – fotokopie kaj preslitere. Siatempe mi recenzis ĝin. Laŭ mia memoro: iom strange estas, ke la erara redono Contona (p. 32 ĉe Dratwer) de la manskribita bontona (p. 33 samlibre – oni do mislegis ŝajne la minusklan b kiel majusklan C), pri kiu siatempe mi atentigis, ne estas ĝustigita.

Oni bonvolu do en p. 302 de la nova verko ĝustigi tion en la antaŭlasta linio.

La leteroj, kiuj restas de Lidia, ĉefe temas pri renkontiĝoj kun konatoj, pri Ĉe-kursoj, kiujn ŝi donis, pri prelegoj en bahaaj kunvenoj ktp. Estas bone konservi tiujn atestaĵojn de ŝia vivo – eĉ se enhave fojfoje ili estas sufiĉe simplaj.

En la nuna libro kelkfoje okazis bedaŭrinda komputila ŝovo de linioj al sekva paĝo. La unuaj du linioj de p. 323 troviĝas tute sube je p. 322; la 3 lastaj linioj de p. 325 troveblas je p. 326 supre.

Pli interesa supozeble por la ĝenerala publiko estas la unua parto de la libro – paĝoj 29-297. Jen ŝi donas tute modelan recenzon – p. 84-92 – pri Sinjoro Tadeo, p. 174-183 pri Plena Gramatiko de Kalocsay-Waringhien; jen kortuŝas nin tute senpretenda memoraĵo pri rompita paperpremilo el la gepatra domo – p. 105-106; jen trafas la priskriboj pri kreskantaj zorgoj pri la malproksima patrujo Pollando – p. 121-123: „kapti la eĥojn el fora Polujo”; jen estas klara pledo kontraŭ tro da neologismoj, pledo por multaj tre rekonebla ankoraŭ – p.

124-125. En pluraj tekstoj oni kvazaŭ travidas la animon mem, kiun nutras la bahaa fido: sur p. 161, ekzemple, ŝi provas klarigi, ke laŭ ŝia kompreno vere konkrete ekzistanta malbono tutsimple ne ekzistas:

ekzistas nur „manko de bono” (la saman doktrinon oni konas ĉe Aŭgusteno). Kelkfoje ŝi regalas nin per ŝajne simpla fabelo – pri Hom’

kaj lia ombro – p. 242-246.

Viva junulino

Kiel ajn oni aliras ĉi tiun libron, ĉu kiel historiisto, kiu deziras plireliefigi la historion de la leginda libro de Wendy Heller – Lidia, la vivo de la Lidia Zamenhof; filino de Esperanto, ĉu kiel simpla esperantisto scivola pri tiu filino de Zamenhof, ĉu kiel interesito pri la frua bahaa historio – kiel ajn: ĉi libro montras ege vivan junulinon, kiu vidis la kreskantajn minacojn de naziismo kaj milita perforto, kiu samtempe plu fidis je pozitivaj fortoj – fortoj de Dio kaj fortoj de homa fidelo – kaj kiu ĝis sia morto plu strebis al la bono. Tamen, kiam fine ŝi reiras hejmen meze de la minacoj, oni tamen emas demandi sin, ĉu iel ankaŭ ŝi eble estis iom naiva, ne povante kredi je tioma malbono de naziismo. Sed mi kredas, ke tiun subtaksadon de la malbonaj fortoj povus fari preskaŭ ĉiu.

Lidia poluris sian lingvuzadon ĝis alta nivelo. Estas bone kompreneble, ke dumlonge ŝi estis kvazaŭ unika reprezentantino de Esperanto, kiel vojaĝanta instruistino, kiu logis amasojn al siaj kursoj.

Dankon al la kompilintoj por la konservado de ĉi memoroj!

Gerrit BERVELING

Lidia Zamenhof: Por ke la tagoj de la homaro estu pli lumaj. Kompilis J.

Amouroŭ, Z. Banet-Fornalowa, M. Higasida, B. Westerhoff. Antaŭparolo de L.C. Zaleski-Zamenhof. Eld. FEL, Antverpeno, 2008. 429 paĝoj. ISBN 9789077066386.

Prezo ĉe FEL de la bindita eldono: 24 EUR + afranko.

Prezo ĉe FEL de la e-libro: 14,39 EUR

Sabata Verda Kafo.

nobody@ipernity.com (Karesema) — Mon, 30 Nov 2009 13:05:55 +0000

Karesema has added a post:

Estis tiel kiel kutime.Eventuale ia Verda-Kafo pli esperanta. Pro tio, ke Esperanto reale iĝis ponto por faligi lingva-baron inter homoj de malsamaj lingvoj.Ĉar se oni vere pripensas pri interkompreniĝo mondlingva, vere ĉikaze Esperanto plenumis la taskon.Estis kvarhora kunsido inter francoj kaj brazilanoj kaj Esperanto estis la unusola lingva ligo kaj ĝi estis ege taŭga.Okazis amuzaĵo, trinkado de nigra kafo kaj fruktsuko, (la francoj)kaj kompreneble drinkado de biero, krom serioza parolado pri malfacilaĵoj de nia lingva-parolmaniero.Ni interkonsentis pri diversaj faktoroj de nia lingvo kaj malkonsentis pri kelkaj aliaj.Sed tio ne estis problemo ĉar ni scias, ke bona ideo kaj bona solvo ĉiam estas rezulto de malsimilaj opinioj, kiuj aldoniĝas al la tutaĵo.

Estis sukcesa, fruktdona, amuza , amikema kunsido.

P.S. Mi miris, ke la francoj ne drinkas vinon kaj eĉ bieron.

Bone...Mi ĉiam pensis, ke mi estas stranga gaŭĉino ĉar mi ne trinkas ĉimaronon.hehehe!

Novjaraj Bondeziroj...diverslingve!

nobody@ipernity.com (Karesema) — Sun, 22 Nov 2009 17:57:22 +0000

Karesema has added a post:

Feliĉan Kristnaskon kaj Prosperan Novjaron!

Ĉar proksimiĝas Kristnasko kaj la Nova Jaro, mi proponas al ĉiuj miaj geamikoj el diversaj landoj, ke ili lasu en la parto por komento, novjaran bondeziron en sia gepatra-lingvo.

Venu kaj aniĝu al la listo, tio pruvos ke Esperanto estas parolata de diversaj lingvo-parolantoj.

Feliz Natal e Prospero Ano Novo!

Simpla solvo

nobody@ipernity.com (Karesema) — Thu, 19 Nov 2009 11:13:20 +0000

Karesema has added a post:

Traduko de Josenilton.

Dum konsulto, la paciento plendis al la psikiatro pri sia problemo:

- Ĉiam, kiam mi ĵus kuŝas sur mia lito, mi opinias, ke estas fremdulo sub ĝi. Kaj, kiam mi eniras sub la liton por kontroli, tie mi opinias, ke estas fremdulo sur ĝi! Do, mi resupreniras kaj poste remalsupreniras serĉe de la fremdulo, dum multaj fojoj. Ŝajnas, ke mi estas freneza!

Proponis la psikiatro:

- Lasu min flegi vin. Venu tri fojojn ĉiusemajne, dum du jaroj, kaj mi kuracos vin.

- Kiom kostos ĉiu seanco? – demandis la paciento.

- Cent dudek spesoj. – respondis la profesiulo.

- Nu, mi pripensos, kaj poste mi decidos. – konkludis la konsultanto.

Post ses monatoj, ili renkontiĝis surstrate.

- Kial vi ne plu konsultis min? – volis scii la psikiatro.

La konsultinto klarigis:

- Cent dudek spesoj po ĉiu seanco, tri fojojn posemajne, dum du jaroj... estus tre altkoste al mi. Cetere, nelonge post tiu konsulto, najbaro mia kuracis min kontraŭ nur dek spesoj.

- Ĉu vere?! Kiel? – volegis scii la doktoro.

La karacito respondis:

- Li forsegis la piedojn de mia lito.

Sherlock Holmes kaj D-ro Watson iris kampadi.

nobody@ipernity.com (Karesema) — Thu, 19 Nov 2009 11:06:36 +0000

Karesema has added a post:

TraDUKO DE jOSENILTON.

Stariginte la tendon, ili vespermanĝis kaj konversaciis. Fine, ili eniris en siajn dormosakojn kaj endormiĝis.

Post kelkaj horoj, la fama detektivo skuis kaj vekis la amikon.

- " Watson, rigardu la plenstelan ĉielon, kaj diru kion vi vidas."

D-ro Watson respondis:

- “Mi vidas milionojn da steloj.”

- “Jes... Sed, kion vi deduktas el tio?” – demandis Holmes.

Rezoninte unu momenton, D-ro Watson belmaniere respondis:

- “Nu, astronomie, mi povas aserti, ke ekzistas milionoj da galaksioj kaj, potenciale, miliardoj da planedoj. Astrologie, estas konstateble, ke Saturno estas en konjunkcio kun Kankro. Alivorte, laŭ la pozicio de la polusa stelo, estas supozeble, ke nun estas ĉirkaŭ la tria kaj kvarono frumatene... Kaj vi, Holmes? Kion vi deduktas el tiu brila stelaro super ni?”

Sherlock respondas:

- "Estas facile kompreneble, mia kara Watson... IU ŜTELIS NIAN TENDON!!! VI SENATENTEMULO!!!"

Esperantigita interreta anekdoto.

nobody@ipernity.com (Karesema) — Tue, 17 Nov 2009 11:14:31 +0000

Karesema has added a post:

Pirato konatiĝis kun juna maristo en trinkejo kaj rakontis siajn aventurojn sur la maroj.

La junulo rimarkis, ke la pirato havas unu kruron el ligno, unu hokon kiel manon kaj unu okulkovrilon. Scivole, li demandis:

- Kial vi havas tiun lignokruron?

La pirato klarigis:

- Ni alfrontis rigoran ŝtormon sur la maro. Giganta ondo invadis la ŝipon kaj ĵetis min eksteren. Mi falis meze inter ŝarkoj. Mi batalis kontraŭ ili, kaj sukcesis reveni al la ŝipo, sed unu ŝarko formanĝegis mian kruron.

- Aĥ!!! Kia aventuro! Sed... kaj la hoko? Ĉu ankaŭ kulpis la ŝarko?

- Ne! La hoko devenis el alia historio. Ni estis farantaj albordan atakon kontraŭ malamika ŝipo, kaj, dum ni batalis, mi estis ĉirkaŭata de kvar maristoj. Mi sukcesis mortigi tri el ili, sed la kvara detranĉis mian manon.

- Ho ve ho!!! Nekredeble!! Kaj pri la okulkovrilo?

- Falis fekaĵo de kolombo en mian okulon.

- Sed, ĉu vi perdis okulon nur pro fekaĵo de kolombo?!?!

- Nu... estis mia unua tago kun la hoko...

JOSENILTON!

Ha, se nur ili parolus saman lingvon!

nobody@ipernity.com (Karesema) — Tue, 17 Nov 2009 11:10:54 +0000

Karesema has added a post:

Josenilton!

Mi eniris la sektoron de intensa flegado en hospitalo, por viziti mian japanan najbaron Suĵiron, kiu estis suferinta seriozan aŭtomobilan akcidenton.

Li kuŝis sub tubaro, kun la okuloj fermitaj, tute senmova.

Starinte apud lia lito kaj vidinte lin serenan, ripozantan kun ĉiuj tiuj tuboj, mi faris silentan preĝon.

Dum tio, subite, li vekiĝis, malfermegis la okulojn kaj kriis:

- SAKARO... AOTA NAKAMY ANYOBA, SUSHI MASHUTA!!!

Kaj li vespiris kaj mortis.

Sed, la lastaj vortoj de mia amiko restis konservitaj en mia kapo!

Dum la post-septaga meso, mi aliris al lia patrino, por kondolenci ŝin. Kaj mi profitis la okazon:

- Sinjorino Fumiko... Antaŭ ol morti, Suĵiro elparolis al mi la sekvajn vortojn: "SAKARO AOTA NAKAMY ANYOBA, SUSHI MASHUTA!!!" Kion ili signifas?

Ege mirplena, Sinjorino Fumiko rigardis min kaj tradukis:

- "LEVU VIAN PIEDON DE SUR LA OKSIGENTUBETO, VI AĈULO!!!"

Mensa Sano

nobody@ipernity.com (Karesema) — Mon, 16 Nov 2009 15:54:51 +0000

Karesema has added a post:

Rubem Alves

Mi estis invitata fari prelegon pri mensa sano. Kiuj invitis min, tiuj supozis, ke mi, kiel psikanalizisto, fakas pri tiu afero. Ankaŭ mi same pensis, tiel, ke mi akceptis la inviton.

Sed, apenaŭ mi enpensiĝis serioze pri la afero, mi pentis. Mi konkludis, ke mi scias nenion. Mi klarigu min. Mi komencis mian pripenson farante liston da homoj, kiuj, laŭ mia vidpunkto, havis riĉan kaj viglan mensan vivon... homoj, kies libroj kaj verkoj estas nutraĵo al mia animo. Nietzsche, Fernando Pessoa, Van Gogh, Wittgenstein, Cecília Meireles, Maiakovski. Sed, mi tuj maltrankviliĝis. Nietzsche freneziĝis. Fernando Pessoa estis drinkema. Van Gogh sin mem mortigis. Wittgenstein ĝojigis sin tiam, kiam li eksciis, ke li mortos baldaŭ: li ne plu sukcesis vivi kun tiom da angoro. Cecília Meireles suferadis mildan kronikan deprimon. Maiakoviski suicidis.

Tiuj klarmensaj kaj profundaj homoj daŭre estos pano al la vivantoj, dum longa tempo, post kiam ili estos tute forgesitaj. Sed, ĉu ili havis mensan sanon? Mensa sano – tiu stato pere de kiu la ideoj kondutas bone, ĉiam samaj, antaŭkalkulebla j, sen surprizoj, obeemaj al la ordonoj de la devo, kun ĉiuj aferoj en siaj ĝustaj lokoj, kiel vicordigitaj soldatoj, neniam permesante, ke la korpo manku al la laboro, nek ke ĝi faru ion neatenditan.

Eĉ ne necesas ĉirkaŭi la mondon per velŝipo. Sufiĉas fari tion, kion faris Shirley Valentine (se vi ankoraŭ ne vidis, vidu la filmon), aŭ sperti malpermesitan amon, aŭ, pli danĝere ol ĉio, havi la kuraĝon pensi tion, kio neniam estis pensata.

Penso estas afero tre danĝera... Ne, mensan sanon ili ne havis... Ili estis tre klarmensaj kontraŭ tio. Ili konsciis, ke la mondo estas regata de frenezuloj kaj maljunuloj kun kravatoj. Kiel mastroj de la povo, la frenezuloj fariĝas la prototipoj por la mensa sano.

Kompreneble, neniu el tiuj nomoj, kiujn mi menciis, postvivus psikologian teston, al kio li devus submetiĝi, se li petus dungon en entrepreno. Aliflanke, mi neniam aŭdis pri politikistoj havantaj deprimon. Ili marŝas ĉiam fortaj en piedirejoj tra la urbostratoj, disdonantaj ridetojn kaj certecojn.

Mi sentas, ke miaj pensoj povas sami al pensoj de frenezulo, kaj tial mi tuje faru la necesajn klarigojn. Ni estas tre similaj al komputiloj. La funkciado de la komputiloj, kiel sciate, postulas la interagon de du partoj. Unu el ili nomiĝas aparataro aŭ, laŭlitere [1], “malmola ekipaĵo”, kaj la alia nomiĝas programaro aŭ “mola ekipaĵo”. La aparataro konsistas el ĉiuj solidaj aferoj, el kiuj la komputilo estas farita. La programaro estas konsistigita el “spiritaj” entoj – simboloj, kiuj formas la programojn kaj kiuj estas konservitaj en diskojn. Ankaŭ ni havas unu aparataron kaj unu programaron.

La aparataro estas la cerbaj nervoj, la neŭronoj, ĉio tio, kio konsistigas la nervan sistemon. La programaro konsistas el serio da programoj, kiuj restas konservitaj en la memoro. Tiel same kiel en la komputiloj, tio, kio restas en la memoro, estas la simboloj, malpezegaj entoj, eĉ nomeblaj “spiritaj”. La plej grava programo estas la lingvo.

Komputilo povas freneziĝi pro difektiĝoj en la aparataro, aŭ pro difektiĝoj en la programaro. Ankaŭ ni. Kiam nia aparataro freneziĝas, oni devas venigi psikiatrojn kaj nervologojn, kiuj venos al ni kun siaj ĥemiaj porcioj kaj bisturioj por ripari tion, kio pereis. Tamen, kiam la pereo okazas en la programaro, porcioj kaj bisturioj ne efikas.

Oni ne riparas programon per ŝraŭbturnilo, ĉar la programaro estas farita el simboloj, kaj nur simboloj povas eniri en ĝin. Ni aŭdas kanzonon, kaj sekve ni ploras. Ni legas erotikajn poemojn de Drummond, kaj la korpo ekscitiĝas. Prezentu al vi sonaparaton. Imagu, ke la gramofono kaj ties akcesoraĵoj (la aparataro) kapablas aŭdi la muzikaĵon, kaj sekve emociiĝi. Imagu pli, ke la beleco estas tiel granda, ke la aparataro ne entenas ĝin, kaj sin difektas pro la emocio!

Nu, estis ĝuste tio, kio okazis al tiuj homoj, kiujn mi menciis en la komenco: la muziko, kiu aŭdiĝis el ilia programaro estis tiel bela, ke ilia aparataro ne subtenis...

Post tiuj konjektaĵoj, ni povas preskribi recepton, kiu certigos al tiuj, kiuj severege sekvos ĝin, “mensan sanon”, ĝis la finiĝo de iliaj vivoj.

Prefere elektu modestan programaron. Evitu la belajn kaj kortuŝajn aferojn.

La belo estas danĝera al la aparataro. Singardu kun la muziko... Brahms, Mahler, Wagner, Bach estas speciale kontraŭindikataj. Pri la legaĵoj, evitu tiujn, kiuj estas pensigaj. Sed, restu trankvila. Estas vasta literaturo specialigita por malebligi la pensadon. Se estas libroj de D-ro Lair Ribeiro, kial riski legi Saramagon?

La ĵurnaloj favoras al tiu sama celo. Ili devas esti legataj ĉiutage. Ĉar ili publikigas ĉiam la samajn aferojn, kun malsamaj nomoj kaj vizaĝoj, estas certigate, ke nia programaro pensos ĉiam samajn aferojn. Kaj, en la dimanĉoj, ne forgesu Silvio Santos kaj Gugu Liberato[2].

Sekvante tiun recepton, vi ĝuos vivon trankvilan, kvankam banalan. Sed, ĉar vi kulturis la sensentemecon, vi ne perceptos, kiel banala ĝi estas. Kaj, anstataŭ sperti la saman destinon de tiuj homoj, kiujn mi komence citis, vi emeritiĝos por realigi viajn sonĝojn. Bedaŭrinde, tamen, kiam alvenos tiu momento, vi jam estos forgesinta, kiaj ili estis...

[1] La laŭlitereco originas el la angla fakvorto “hardware”, kiu komence direblis hardvaro en Esperanto, kompare kun “software”, kiu antaŭe E-nomiĝis softvaro.. – La tradukinto.

[2] Prezentistoj de popularaj brazilaj televidprogramoj, samtrajtaj al “Domingão do Faustão” kaj “Raul Gil”. – Noto de la tradukinto.

VIRINO IRAS DORMI...

nobody@ipernity.com (Karesema) — Sat, 14 Nov 2009 23:22:13 +0000

Karesema has added a post:

traduko de bildoj :)

La Virino iras dormi.

La gepatroj rigardis televidon kaj panjo diris : " Jam estas malfrue, mi estas laca, mi iros dormi ".

Kaj ŝi iris al kuirejo por prepari sandviĉojn por ni por morgaŭa lunĉo, ŝi lavis maizon, elprenis viandaĵon el fridujo por vespermanĝo, kontrolis kvanton damatenmanĝaj avenflokoj en ujo, alverŝis sukeron en sukerujon, metis kulerojn kaj telerojn en tablon kaj preparis kafo-ekspreson por morgaŭa mateno.

Pli poste ŝi enmetis jam lavitajn aĵojn en sekigilon, enmetis novan porcion da aĵoj al lavilo, gladis ĉemizon kaj alkudris butonon. Ŝi forprenis de tablo ludilon, konektis telefonaparaton al ŝarĝigilo, demetis libron, pendigis mantukon por sekigi. Poste ŝi oscedis, rektigis sian korpon kaj iris al dormejo.

Ŝi haltiĝis ĉe skribotablo kaj skribis karton al instruisto, lasis iom da moneroj por ekskurso kaj elprenis lernolibron de sub la seĝo.

Ŝi skribis naskiĝan gratulkarton al amikino, adresis la koverton kaj surgluis poŝtmarkon, kaj skribis kion aĉeti en manĝejvendejo.

Ambaŭ kartetojn ŝi metis apud mansaketo. Poste ŝi lavis sian vizaĝon per lakto " tri en unu ", ŝmiris per pomado " por nokto kaj kontraŭ maljuniĝo", purigis dentojn kaj fajlis ungojn.

La Patro ekvokis : "Mi pensis ke vi iris al lito" - "Ĵus mi iras" - ŝi respondis.

Ŝi enverŝis iom da akvo en hundan poton kaj ellasis katon eksteren, poste ŝi kontrolis ĉu la pordo estas fermita kaj ekstera lampo estas enŝaltita.

Ŝi enrigardis en ĉambrojn de ĉiuj infanoj, elŝaltis lampetojn kaj televidilojn, pendigis ĉemizojn, enĵetis malpurajn duonŝtrumpojn en korbon, kaj mallonge alparolis al unu de infanoj, kiu ankoraŭ faris doman lecionon.

En sia ĉambro Virino kontrolis vekhorloĝon, elprenis vestaĵojn por morgaŭ, riparis ŝuo-standon.

Ŝi alskribis 3 aĵojn al listo de 6 gravaj aferoj por fari. Ŝi ekpreĝis kaj imagis al si mem ke ŝi atingis siajn celojn.

En la sama tempo la Viro elŝaltis televidilon , kaj ekdiris "en la aeron" : " Mi iras dormi", Kaj tion tuj faris.

Kio eksterordinara estas en tiu ĉi historio ?

Ĉu vi meditis kial Virinoj vivas pli longe ?

"CAR NI ESTAS KONSTRUITAJ POR PLI LONGA ITINERO..." ( KAJ NI NE POVAS MORTI PLI FRUE, ĈAR NI ANKORAŬ HAVAS TIOM POR FARI !!! )

Sendu ĉi tiun historion al 5 fantastaj Virinoj - certe ili estos tre dankemaj al vi. Kaj al Viroj - por ke ili iom meditu.

Kaj poste IRU DORMI !

- - - -

Trad. : Skorpio. :)"

BONAN MATENON!

nobody@ipernity.com (Karesema) — Thu, 12 Nov 2009 10:22:26 +0000

Karesema has added a post:

Ha! Kia ĉarma vetero estas Printempo! Hodiaŭ 20 gradoj da plenplena plezurega temperaturo. Naturo floras kaj florigas parkojn, stratojn , ĝardenojn.Animo de homoj sentemaj krevas pro ĝojo al tia bela sezono.La tagoj parfumas kaj parfumigas la aeron.Promeni ekstere estas ĉiutaga ripoziga momento.Bonaj tagoj estas alparolataj kun vereco..ĉar vere estas bonaj tagoj. Kaj mi spiras profunde kaj kaptas guteton de la vivo.

Miaj gekaraj....*_* HAVU BONEGAN TAGON! *_*

El humursako...Ridu!

nobody@ipernity.com (Karesema) — Wed, 11 Nov 2009 11:04:08 +0000

Karesema has added a post:

ESPERO

- Sinjoro doktoro, diru ion

sincerepri miaj shancoj.

- Temas pri simpla rutina

operacio. Mi jam la okdek

duan fojon faros tian.

- Dankon, en tiu okazo mi

trankvilighis. Ne plu mi timas.

- Tre bone. Nur brave! Ja

fine iam devas sukcesi.

Huszár László

Konato laŭdas la etulon:

-- Kiel belajn okulojn li havas! Tutcerte de la patro!

-- La okuloj, lipoj kaj la nazo estas de la patro. Nur la nomo ne. Tiu estas de mia edzo.

Esperantigis Imre Szabó

RESPONDECO

-- Kion entreprenas la kuracisto, se li estas

senkonsila rilate al iu malsano?

-- Li skribas nelegeblan recepton. Tiel li

imputas la respondecon al la apotekisto.

Huszár László

PLURALO

La instruistino demandas:

-- Kio estas la pluralo de la

substantivo homo?

-- Homoj.

-- Kaj tio de la vorto infano?

-- Ghemeloj.

László Huszár

dulingva kato!!!!!

nobody@ipernity.com (Karesema) — Wed, 11 Nov 2009 10:59:16 +0000

Karesema has added a post:

Longe persekutite de la kato, la muso enkaŝis sin en kavaĵo, kaj tie ĝi restis dum multaj horoj.

Poste, aŭdinte blekon de hundo, ĝi pensis, ke la kato foriris, kaj ĝi ekeliris por promeni. Tamen, apenaŭ ĝi metis la kapon eksteren, ĝi estis kaptata per la ungegoj de la kato.

Surprizite, ĝi demandis:

- Ĉu vi povas imiti bojon?!

Kaj la kato:

- Mia amiko, en tiu ĉi epoko de tutmondiĝo, kiu ne regas almenaŭ du lingvojn, tiu mortos de malsato!

Josenilton

Voko al francoj!!!

nobody@ipernity.com (Karesema) — Sun, 08 Nov 2009 02:01:10 +0000

Karesema has added a post:

Mi enmetis ene de miaj sonaĵoj, kelkajn francajn muzikojn, kiuj delonge estas konservataj en aparta arkivo por muzikoj.Bedaŭrinde sen iu ajn noto pri ili. Tamen mi bone memoras, ke esti iu franca esperantisto, kiu sendis al mi tiujn kortuŝajn muzikojn el la franca lingvo.Mi eĉ kapablas bone memori lian nomon...Daniel.Kaj ankaŭ iam li trovis min tie ĉi.Mi ne scias ĉu ankoraŭ li uzas blogon kaj komunumas tie ĉi.Harzarde mi trovis tian bonegan muzikkolekton ĉe miaj dokumentoj.

Mi profitas mian blogon por peti ĉefe al la francaj esperantistoj helpon aŭ por traduki la tekstojn de tiuj aŭskultindaj francaj muzikoj aŭ rakonti pri kio temas . Mi elkore antecipe dankas.

Karesema

Fidela edzo iam, iel kaj ie ajn !!!!!!!!!

nobody@ipernity.com (Karesema) — Fri, 06 Nov 2009 17:08:58 +0000

Karesema has added a post:

Mi vekiĝis kun forta postdrinka kapdoloro, kaj flanke de la lito estis glaso da akvo kaj du aspirinoj.

Mi rigardis ĉirkaŭen kaj vidis mian tolaĵon gladita kaj pendigita. La dormoĉambro estis en perfekta ordo.

Mi trovis letereton lasitan de mia edzino:

"Karulo, mi lasis vian matenmanĝon preta en la kuirejo. Mi iris en la superbazaron. Kison!"

Mi malsupreniris kaj trovis tablon plenan je manĝaĵoj atendantaj min. Surprizite, mi demandis al mia filino:

- Kio okazis hieraŭ?

- Nu, paĉjo, vi alvenis je la tria frumatene, tute ebria, kaj vi vomis sur la tapiŝon, frakasis meblojn, pisis en la vitroŝrankon kaj faris aliajn damaĝojn, ĝis vi eniris en la dormoĉambron.

- Kial, tamen, estas ĉio en ordo, kun matenmanĝo bone preparita, tolaĵo gladita, aspirinoj por la postebrio kaj ambileto de via patrino?

- La kialo estas, ke panjo trenis vin al la lito. Sed, kiam ŝi ekdemetis vian pantalonon, vi ekkriis:

NE FARU TION, FRAŬLINO! MI ESTAS EDZIĜINTA, KAJ MI AMAS MIAN EDZINON!!!

Traduko de Josenilton

Mesaĝo pri Ivo Lapenna.

nobody@ipernity.com (Karesema) — Thu, 05 Nov 2009 17:58:38 +0000

Karesema has added a post:

Transsendante. ...

5/11/09, Esperanto-Centro Eventoj en Budapeŝto <oficejo@eventoj. hu> escreveu:

De: Esperanto-Centro Eventoj en Budapeŝto <oficejo@eventoj. hu>

Assunto: ret-info: Mesaĝo pri Ivo Lapenna

Mesaĝo pri Ivo Lapenna

Prof. d-ro Ivo Lapenna (1909-1987), kies centjariĝon ni festas la 5-an de novembro en 2009, estis sendube la plej elstara inter la gvidantoj en la organizita Esperanto-movado. Oni ofte ligas lian esperantistan karieron specife kun Universala Esperanto-Asocio, kiun li gvidis en ties modernan institucian formon. Sed lia kontribuo al la Movado superverŝas la limojn de tiu institucia identeco.

Lapenna estis la plej elstara oratoro en la historio de la lingvo. Lia verko "Retoriko", kiu instruas la arton de parola persvadado, vicas inter la klasikaĵoj pri tiu temo en iu ajn lingvo. Liaj paroladoj restas modeloj ofte aŭskultataj de sinsekvaj generacioj. La sukceso de lia retoriko en Montevideo en 1954 estis venko ne nur por UEA, kiun li tie reprezentis, sed ankaŭ por la parola persvadado, la sola akceptebla batalilo en serioza batalado por la paco. Li multe laboris ne nur por akceptigi kaj fortikigi la demokratian metodaron, sed ankaŭ specife por pliakrigi la retorikon kaj plivastigi la kapablon de publikaj agantoj efike uzi ĝin. Multaj el ni ne memoras, ke li ankaŭ fake okupiĝis pri la evoluigo de nia lingvo: en la Simpozio pri ata/ita, libroforme organizita de la eldonejo Stafeto, gramatikistis kun aliaj gramatikistoj ankaŭ Ivo Lapenna, tute kapable kaj senglite.

Tamen kompreneble li specife apartenis al tute alia fako: li estis grava fakulo pri la internacia juro, kaj ĝuste surbaze de tiu sia faka kono li muldis la postmilitan laborlinion de UEA. Lia sinengaĝo sur la tereno de la homaj rajtoj kreis apartan profilon ne nur por UEA, sed ĝenerale por la Esperanto-movado de post la dua mondmilito. Pro liaj klopodoj UEA jam ekde 1947 - unu jaron antaŭ la formala adoptiĝo de la Universala Deklaracio de Homaj Rajtoj en Unuiĝintaj Nacioj - enstatutigis la principon, ke la respektadon al homaj rajtoj UEA rigardas kiel nepran antaŭkondiĉon por siaj laboroj.

Al la hodiaŭa generacio devus esti grave, ke li estis inter la unuaj, kiuj en la batalo por konservi la malfortajn lingvojn kaj kulturojn emfazis la koncepton de lingva genocido kiel juran batalilon. El la perspektivo de la juro li prezentis analizon de la lingva geopolitiko kaj bazis sur tio la pledadon por Esperanto kiel justa solvo. La principoj de tiu analizo akiras pli ĝenerale agnoskatan gravecon hodiaŭ, kiam multaj komentantoj iom post iom agnoskas la valoron de moralaj (anstataŭ nur de pragmatikaj) konsideroj en la agado sur la monda scenejo, kaj kiam la voĉoj de la neregistaraj organizaĵoj kiel portantoj de tiuj moralaj valoroj - foje opozicie al la foje senmoralaj ŝtataj sistemoj - plifortiĝas en la internaciaj institucioj.

Mi ne volas en tiel grava jubilea momento paroli ĉefe pri la UEA-kariero de figuro, kiu tiel elstare skulptis tutan ĉielpejzaĝon por la lingvanaro kiel tuto: tro mallarĝe limigi lin al nia asocio donus la impreson, ke ni volus iel ŝteli lian vizaĝon por ni! De LPLP (kiu en lia tempo havis la pranomon "La Monda Lingvo-Problemo" ) ĝis la serio Oriento-Okcidento, de la dumkongresa oratora konkurso ĝis la roterdama oficejo de UEA, tiom da institucieroj de nia asocio atestas lian ĉarpentistan lerton, ke ni prefere ne eku pri tiu temo, sed lasu al la tuta esperantista publiko, sendiskriminacie pri asocia aparteno, aplaŭdi la memoron de tiu homo, kiu donis al ni plej da kialoj por aplaŭdi! Li estis unu el tiuj malmultegaj, pri kiuj eblas tute sincere kanti, "La mond' aliiĝos, la temp' pasos for/ sed vivos eterne pri ili memor'."

Probal Dasgupta

prezidanto de UEA

gk de UEA

ndlr: Foto pri Lapenna: http://www.ivolapen na.org/index/ lapenna_farve. jpg

fonto: Ret-Info

http://www.eventoj. hu

Internacia Kalendaro de Esperanto-Renkontig xoj - Detala listo ĉe: http://www.eventoj. hu